TARURA Taasisi ya Kwanza Kutekeleza Kampeni ya Upimaji wa VVU

Imewekwa tar.: June 27th, 2018

Nteghenjwa Hosseah, OR-TAMISEMI

Ikiwa ni Wiki moja tangu Waziri Mkuu wa Jamhuri ya Muungano wa Tanzania Mhe. Kassimu Majaliwa Majaliwa  kuzindua Kampeni ya Furaha Yangu chini ya Mpango wa Taifa wa Kudhibiti UKIMWI ambayo inalenga kupima Vvu na kuanza Arv’s mapema na kuagiza Taasisi zote za Serikali kutekeleza kampeni hii Wakala wa barabara za vijijini na mijini (TARURA) imekua Taasisi ya kwanza chini ya  Ofisi ya Rais TAMISEMI kutekeleza Agizo hili.

Akizungumza wakati wa ufunguzi wa mafunzo  ya kujikinga na Vvu/ Ukimwi kwa  wafanyakazi wa TARURA Makao Makuu Waziri wa Nchi Ofisi ya Rais TAMISEMI Mhe.Selemani Jafo amesema zoezi hili litawafanya Wafanyakazi kufahamu afya zao na kuchukua hatua stahiki ya kuanza dawa mapema kwa wale watakaobainika kuwa wameathirika.

“Zoezi hili mtakalolifanya  leo linaonyesha nia yenu ya dhati ya kutaka kufanya kazi kwa bidii kwa sababu litawawezesha kutambua Afya zenu na kupanga namna ya kuenenda katika kutumikia Taasisi hii mpya na changa katia sekta ya miundombinu yenye lengo la kuboresha mtandao wa barabara zilizoko katika Mamlaka za Serikali za Mitaa” amesema Jafo.

Aliongeza kuwa ukijitambua inasaidia kupanga mipango yako ya kazi na maisha kwa ujumla, kitu ambacho kitakusaidia katika kutekeleza kazi zako kwa ujasiri na furaha zaidi tofauti na pale utakapokuwa hutambui afya yako wakati wowote unaweza kuanza kuumwa kitu ambacho  kitapunguza ufanisi katika kazi zako za kila siku.

Aidha Waziri Jafo aliwapongeza Uongozi wa TARURA kwa kuwa Taasisi ya kwanza chini ya Ofisi yake  kutekeleza Agizo la Waziri Mkuu lililozitaka Taasisi za Serikali kuanza zoezi la  upimaji wa VVU kwa watumishi wa Umma.

Waziri Jafo alitumia jukwaa hilo kuwakumbusha wakandarasi wote wanaotekeleza miradi ya barabara katika Mamlaka za Serikali za Mitaa kufanya kazi hizo kwa ufanisi kwani hatasita kuagiza kusitishwa kwa mkataba wa Mkandarasi yeyote atakayeonyesha kulegalega katika ujenzi wa kazi za barabara.

Naye Kaimu Mtendaji Mkuu wa TARURA Mhandisi Abdul Digaga amesema zoezi  la upimaJi  na utoaji wa mafunzo ya kujikinga na VVU kwa wafanyakazi wa TARURA litatanguliwa na mafunzo kisha upimaji utakaofanyika kwa muda wa siku mbili KATIKA Makao Makuu ya TARURA na litaendelea mpaka kwenye ngazi za Mikoa na Halmashauri zilipo Ofisi za TARURA.

Mwisho.