TAMISEMI YAIBUKA MSHINDI 88 KANDA YA KATI

Imewekwa tar.: August 9th, 2022

Na Fred Kibano, Dodoma

Ofisi ya Rais TAMISEMI imeibuka mshindi wa kwanza kwa kundi lake la Wizara za Kisekta zinazotoa Huduma za Jamii kwa kuwa Mshindi wa kwanza ikiwaacha Ofisi ya Rais IKULU – MKURABITA nafasi ya pili na Hospitali ya Benjamini William Mkapa  nafasi ya tatu.

Mkurugenzi Msaidizi Idara ya Tawala za Mikoa Bw. Jonson Nyingi alipokea cheti cha ushindi wa kwanza kutoka kwa Mkuu wa Mkoa wa Dodoma Rosemary Senyamule wakati wa kilele cha Nanenane katika viwanja vya Nzuguni Dodoma kwa Kanda ya Kati na kusisitiza kuendeleza mshikamano, kuwajali na kuwahudumia wananchi kwa juhudi na maarifa.  

Hafla ya utoaji Vyeti, Tuzo na Fedha taslimu ilifanyika wakati wa kilele cha Nanenane Kanda ya Kati baada ya hotuba ya mgeni rasmi na ndipo Ofisi ya Rais TAMISEMI ikaibuka na ushindi huo.

Mgeni Rasmi ambaye ni Mkuu wa Mkoa wa Dodoma Bi. Rosemary Senyamule alisema Serikali imewapatia Maafisa Ugani wa Mamlaka za Serikali za Mitaa vitendea kazi ambavyo ni pikipiki ili waweze kuwafikia wakulima wote badala ya kukaa maofisini wakisingizia usafiri wa uhakika.

Kuhusu pembejeo amesema Serikali imejipanga kuhakikisha wakulima wanakuwa na uhakika wa upatikanaji wa mbolea ya ruzuku ili waweze kulima kwa tija na kibiashara kama inavyosema kauli mbiu ya mwaka huu 2022.

“Serikali imeimarisha upatikanaji wa pembejeo mwaka huu baada ya miaka mingi kwa wakulima kutopata ruzuku ya pembejeo, Mhe. Rais ameahidi utoaji wa pembejeo kwa wakulima hasa mbolea ambayo imekuwa kilio kikubwa kwa wakulima kwa muda mrefu” alisema Mkuu wa Mkoa wa Dodoma Senyamule.

Kauli mbiu ya maonesho ya mwaka 2022 inasema, "Ajenda 10/30 “Kilimo ni Biashara, Shiriki Kuhesabiwa kwa Mipango Bora ya Kilimo, Mifugo na Uvuvi” ambapo Maonyesho hayo kwa Kanda ya Kati yanamalizika hapo kesho katika Jiji la Dodoma Mkoani Dodoma.

Taasisi za Ofisi ya Rais TAMISEMI zinazoshiriki kwenye maonyesho ya Kanda ya Kati ni pamoja na chuo cha Serikali za Mitaa Hombolo (LGTI), Bodi ya Mikopo ya Serikali za Mitaa (LGLB), Wakala wa Barabara za Vijijini na Mijini (TARURA) na Tume ya utumishi wa Walimu (TSC).