SHUGHULIKIENI CHANGAMOTO KWENYE MAENEO YENU'

Imewekwa tar.: October 4th, 2024

Naibu Katibu Mkuu ( Afya ) Ofisi ya Rais- TAMISEMI  Dkt. Grace Magembe amewataka  Waganga Wakuu wa Mikoa, Halmashauri  pamoja na Wafawidhi wa vituo vya kutolea huduma za Afya ya Msingi nchini kufanya kazi kwa uadilifu pamoja na kushughulikia changamoto zilizopo katika maeneo yao.

Dkt. Magembe ametoa wito  huo alipozungumza na viongozi hao katika kikao kazi kilichofanyika katika viwanja vya maonesho ZIFT  vilivyopo Zanzibar .

“Sekta ya afya imeshikiria maisha ya watanzania sasa tufanye  kazi tukifuata maadili na misingi ya taaluma zetu , tukishirikiana na mkasimama katika  nafsi zenu mtanisaidia mimi kutimiza majukumu yangu,”amebainisha

Aidha, amewataka  kushirikiana na watumishi waliopo chini yao  pamoja na kutatua changamoto zinazowakabili watumishi hao huku akisisitiza kuwa moja ya majukumu yao ni kuwasemea watumishi waliopo katika maeneo yao.

“Niwaombe sana  kama kuna migongano na changamoto baina yenu zitatueni mapema sisi ni viongozi, kazi yetu kubwa ni  kuwasemea watumishi waliopo katika maeneo yetu na sio kuwatengenezea mazingira magumu ya kazi, naumia  sana nikisikia watumishi hawaelewani umoja wetu ndio chachu katika kutimiza majukumu yetu tuwe na moyo wa kusaidiana, ” Amebainisha

Kwa upande wake, Mganga Mkuu wa Mkoa wa Tabora ambae pia ni Mwenyekiti wa Waganga Wakuu  wa Mikoa Tanzania Dkt. Honoratha   Rutatinisibwa ameahidi maelekezo yaliyotolewa yatatekelezwa ili kuendelea kuboresha utoaji wa huduma za afya kwa wananchi.