Shilingi milioni 242 zatumika kukopesha vikundi 46 Tabora

Imewekwa tar.: March 9th, 2021

Na Paul Kasembo, Tabora

Manispaa ya Tabora imetoa shilingi milioni 242 kwa ajili ya kuvikopesha vikundi 46 vya wanawake, vijana na walemavu katika mwaka wa fedha 2019/20.

Mkurugenzi wa Manispaa hiyo Bosco Oddo Ndunguru amesema kati ya vikundi 46, vikundi 32 vya wanawake vilipokea mkopo wa shilingi milioni 160, vikundi tisa vya vijana vilipokea shilingi milioni 57 na vikundi vitano vya walemavu vilipokea shilingi milioni 25.

Hata hivyo Mkurugenzi huyo wa Manispaa ameongeza kuwa Manispaa ya Tabora katika bajeti yake ya mwaka 2019/2020 ilitenga kiasi cha shilingi milioni 421 lakini zilizotolewa ni shilingi milioni 242.

Manispaa ya Tabora imekuwa ikitekeleza takwa la kisheria la kutenga asilimia 10 ya mapato ya ndani kwa ajili ya kutoa mikopo kwa vikundi vya Wanawake, Vijana na Wenye Ulemavu.

Miongoni mwa vikundi vilivyonufaika na mkopo huo ni kikundi cha Upendo kinachoundwa na wanawake 11 ambacho kilianzishwa mwaka 2019 katika kitongoji cha Msangi Kijiji Cha Blockfarm katika Kata ya Kalunde.

Kwa mujibu wa Katibu wa Kikundi hicho Aisha Salum, mwaka 2020 walipata mkopo wa shilingi milioni tano kutoka Mapato ya ndani ya Halmashauri uliowawezesha kujenga banda, kununua vifaranga 200, mbuzi pamoja na chakula cha kuku.

Mradi huo wa ufugaji kuku umewasaidia kuachana kabisa na kazi zisizo na staha ambazo awali walikuwa wakizifanya kwenye mashamba ya tumbaku.

Kikundi kingine ni cha wanawake Wagonga kokoto wa Kazehil Kata ya Ng’ambo mjini Tabora, kikundi kinachoundwa na wanawake 10 ambacho kilipata mkopo wa sh. Milioni tano kutoka mapato ya ndani ya Halmashauri na sasa kinaendesha mradi wa kutengeza sabuni za mche (gwanji).

Mwenyekiti wa kikundi hicho Upendo Simon Meja anasema, “Lita 20 ya mafuta ya Mawese yanayotokana na zao la chikichi ikichanganywa na lita kumi ya mchanganyiko wa maji safi pamoja na acoustic soda wanapata miche ya sabuni kati ya 70 na 90.”

Vijana 10 wa kikundi cha Segehema kilichopo kata ya Ipuli mjini Tabora ambao wanafanya kazi za Useremala wamenufaika na mkopo wa shilingi milioni tano uliowawezesha kupata malighafi ya mbao na hivyo kuchonga samani za aina mbalimbali na kuziuza au kuzipeleka kwenye maonesho tofauti ikiwa ni sehemu ya kujitangaza na kutangaza bidhaa zao.

Vijana wengine wanaojishughulisha na kilimo katika Kijiji cha Kalumwa kilichopo Kata ya Uyui wamenufaika na mkopo wa shilingi milioni tano kupitia kikundi cha Umoja na hivyo kupanua kilimo cha nyanya na mpunga ambapo kwa sasa wamelima eneo lenye ukubwa wa jumla ya ekari 10 za nyanya na ekari 10 ya mpunga kwa maana ya kila mwanachama amelima ekari moja, moja ya nyanya na mpunga.

Aidha kikundi cha watu 10 wenye Ulemavu waliopo Kata ya Chemchem kupitia kikundi cha Chapakazi wamepata mkopo wa shilingi milioni tano kutoka halmashauri ambapo kwa sasa wanajishughulisha na biashara ya usafirishaji.

Kikundi cha Twaweza kinachoundwa na wenye ulemavu nacho kimenufaika na mkopo wa halmashauri wa shilingi milioni tano na kuboresha shughuli zao za kuendesha Mgahawa wa Chakula katika eneo la Bombamzinga Kata ya Kiloleni.