Shilingi milioni 200 kukamilisha maboma manne Busanda

Imewekwa tar.: May 19th, 2021

Na Mathew Kwembe, Dodoma

Serikali imesema katika mwaka wa fedha 2020/21 Halmashauri ya Wilaya ya Geita imetengewa Shilingi milioni 200 kwa ajili ya ukamilishaji wa maboma manne ya Zahanati yakiwemo maboma ya Zahanati za Lubanda na Bujura katika Jimbo la Busanda.

Akijibu swali la Mbunge wa Jimbo la Busanda Mhe.Tumaini Magesa ambaye alitaka kujua ni lini serikali italipatia jimbo hilo vituo vya afya hususani tarafa za Butundu na Busanda, Naibu Waziri Ofisi ya Rais TAMISEMI Mhe.David Silinde amesema Serikali itaendelea kuimarisha miundombinu ya huduma  za afya katika Jimbo la Busanda ikiwemo kujenga Zahanati, Vituo vya Afya na Hospitali kwa kadri ya upatikanaji wa fedha.

Aidha Mhe.Silinde amesema katika mwaka wa fedha 2021/22 Halmashauri ya Wilaya ya Geita imetenga fedha Shilingi milioni 375 kwa ajili ya kuanza ujenzi wa Kituo cha Afya Isulwabutundwe na Shilingi milioni 375 kwa ajili kuanza ujenzi wa ya Kituo cha Afya Butobela.

Mhe. Silinde ameongeza kuwa jimbo la Busanda lina Vituo vya Afya Vitano ambapo vituo vya Afya vitatu vya Nyarugusu, Kashishi na Bukoli vipo katika Tarafa ya Busanda na Vituo vya Afya viwili (2) vya Chikobe na Katoro vipo katika Tarafa ya Butundwe.

Naibu Waziri amesema katika kuendelea kuboresha huduma za afya katika Wilaya ya Geita kuanzia mwaka wa fedha 2018/19 hadi 2019/20 Serikali imeipatia Halmashauri ya Wilaya ya Geita Shilingi bilioni 2.8 kwa ajili ya ujenzi wa Hospitali ya Halmashauri ya Geita, Shilingi bilioni 1.5 kwa ajili ya ujenzi wa Hospitali ya Katoro na Shilingi milioni 400  kwa ajili ya ujenzi wa Kituo cha Afya Nyarugusu.

Pia katika mwaka wa fedha 2020/21 Serikali imetenga Shilingi milioni 500 kwa ajili ya ujenzi wa wodi tatu na Shilingi milioni 500 kwa ajili ya ununuzi wa vifaa tiba katika Hospitali ya Halmashauri ya Wilaya ya  Geita.