Shilingi bilioni 1.5 zatumika kujenga vituo vinne vya afya Tunduru

Imewekwa tar.: April 12th, 2021

Na Mathew Kwembe, Dodoma

Serikali imetumia kiasi cha shilingi bilioni 1.5 kwa ajili ya kujenga na kukarabati vituo vinne vya afya katika wilaya ya Tunduru katika kipindi cha kuanzia mwaka 2017 hadi 2020.

Hayo yamesemwa bungeni leo na Naibu Waziri Ofisi ya Rais Tawala za Mikoa na Serikali za Mitaa Mhe David Silinde wakati akijibu swali la Mbunge wa Viti Maalum kutoka mkoa wa Ruvuma Mhe.Jackline Ngonyani Msongozi ambaye alitaka kujua serikali ina mpango gani wa kujenga vituo vya afya katika kata za Tinginya, Muhimba, Kalulu, Mindu, Nalasi Magharibi, Nalasi Mashariki wilayani Tunduru.

Mhe Silinde amesema katika kipindi cha kuanzia 2017 hadi 2020 serikali imejenga na kukarabati vituo vinne vya afya vya Mkasale, Matemanga, Mchoteka na Nakapanya wilayani Tunduru kwa gharama ya shilingi bilioni 1.5.

Aidha katika mwaka wa fedha 2020/21 serikali imetenga shilingi milioni 200 kwa ajili ya kukarabati maboma manne ya zahanati katika halmashauri ya wilaya ya Tunduru.

Akijibu swali la Mhe Jackline Msongozi, kwa niaba ya Waziri wa Nchi, Mhe Silinde amesema serikali inatambua mahitaji ya vituo vya kutolea huduma za afya ni mengi nchini ikiwemo wilaya ya Tunduru, hivyo serikali inaendelea na jitihada za kutafuta fedha za kujenga na kukarabati vituo vya kutolea huduma za afya nchini ikiwemo vituo vya afya vya Tinginya, Muhimba, Kalulu, Mindu, Nalasi Magharibi, Nalasi Mashariki wilayani Tunduru.