Serikali Yawapa Maagizo Muhimu Maafisa Lishe

Imewekwa tar.: April 30th, 2021

Na Atley Kuni, DODOMA

Maafisa Lishe kutoka Mikoa na Mamlaka za Serikali za Mitaa wamehitimisha kikao cha siku tatu kilichofanyika jijini Dodoma, huku wakiondoka na maelekezo muhimu katika kutimiza wajibu wao.

Katika hotuba yake Mkurugenzi wa Idara ya Afya, Ustawi wa Jamii na Lishe wa Ofisi ya Rais, TAMISEMI, Dkt. Ntuli Kapologwe, iliyosomwa kwa niaba yake na Mkurugenzi msaidizi anayeshughulikia Ustawi wa Jamii, Rasheed Maftaa, ametoa maagizo tisa katika kuisimamia sekta hiyo.

Amewataka Maafisa Lishe, kuhakikisha taarifa za Lishe zinazojazwa katika Mfumo Jumuishi wa Tathmini na Ufuatiliaji wa Taarifa (Information Manangement and Evaluation System -IMES) zinajazwa kwa usahihi, kuhakikiwa na kutumwa Makao Makuu TAMISEMI kwa wakati.

“Natambua kwa sasa tunao mfumo wa IMES, uwepo wa mfumo huu, iwe ni nyenzo muhimu yakutuwezesha kuwa na takwimu sahihi ambazo zitatusaidia katika mipango yetu” amesema Maftaa.

Maftaa amerejea wito wa Katibu Mkuu TAMISEMI, Prof. Riziki Shemdoe, alioutoa wakati wa ufunguzi, kwakuitaka Mikoa ikarejee miongozo ya utoaji wa Shilingi 1000, inayotengwa kwa kila mtoto aliye chini umri wa miaka 5 inazingatiwa kwa kutengwa kama mwongozo unavyoelekeza.

Katika hatua nyingine Mkurugenzi huyo, amewataka Maafisa Lishe hao kuzingatia na kujenga mahusiano mazuri na watumishi wengine ndani ya Idara kama Mratibu wa Mama na Mtoto, Mratibu wa Chanjo, Mratibu wa Ustawi wa Jamii, Maabara kwakutaja baadhi, ili dhana ya “Continuum of Care” ikawasaidie na kuimarisha utoaji wa huduma za lishe.

Jumla ya Maafisa Lishe wa Serikali 120, kutoka ngazi ya halmashauri, mkoa na taifa, wamekutana jijini Dodoma, kujadiliana juu ya afua mbalimbali za lishe na kujengeana uwezo katika kuisukuma sekta hiyo mbele, ambapo wamekutana kwa siku tatu ikiwa ni mkutano Mkuu wa mwaka 2020/21.