Serikali yatumia shilingi bilioni 968 kwa elimu bila malipo nchini

Imewekwa tar.: February 4th, 2020

Serikali imetumia jumla ya shilingi bilioni 968 kugharamia  mpango wa elimu msingi  bila  malipo ambapo  fedha hizo  zinapelekwa  moja kwa moja  katika shule na kuwafikia wanufaika.

Hayo yamesemwa na Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo hivi karibuni wakati akibainisha mafanikio ya ofisi yake katika kipindi cha miaka minne  ya utawala wa Rais wa Jamhuri ya Muungano wa Tanzania  Mhe. John Pombe Mgufuli.

Mhe Jafo amesema  dhana ya utoaji wa elimumsingi  bila malipo inazingatia  uendeshaji wa shule bila ada wala michango yeyote ya lazima kutoka kwa  wazazi au walezi wa wanafunzi ambapo mpango huo Disemba 2015  hadi Desemba  2019

Anafafanua kuwa kuanzia Disemba  mwaka 2015  Serikali ilianza  kutoa shilingi bilioni 18.77 kila mwezi  kwa ajili ya kugharamia  mpango wa elimu bila malipo  mpaka mwaka  2017 ambapo Serikali ilihuisha  kiwango hicho.

“Kuanzia julai ,2017  ilihuisha  kiwango hicho  na sasa kila mwezi  zinatolewa shilingi  bilioni 23.8  zikiwamo shilingi  bilioni 3  zinazopelekwa baraza la mtihani  Tanzania kwa ajili  ya shughuli za Mitihani, hivyo ongezeko la bajeti  lililotokana na ongezeko la idadi ya wanafunzi  wanaonufaika na mpango huo”ameongeza Mhe. Jafo

Mhe Jafo anaendelea kusema kuwa  katika kipindi hicho  shule za msingi za za Serikali  zimepokea shilingi  bilioni 440.52 ambapo kati ya hizo  shilingi bilioni 31.58 zimetolewa kwa ajili  chakula kwa wanafunzi wa bweni, chakula kwa wanafunzi wa kutwa shilingi bilioni 15.28, ruzuku  ya uendeshaji shilingi bilioni 217, posho za  madaraka  kwa wakuu wa shule  shilingi bilioni 138.51 na posho za madaraka  kwa maafisa  elimu shilingi bilioni 40.98

Hata hivyo,  amesema  kwa upande wa shule za Sekondari mpaka sasa zimepokelewa shilingi bilioni 527.57 ambapo chakula kwa wanafunzi  wa bweni ni  shilingi bilioni 258.50, fidia ya ada kwa wanafunzi wa kutwa shilingi  bilioni 115.49, fidia ya ada kwa wanafunzi wa bweni  shilingi bilioni 96.18 na posho za madaraka  kwa wakuu wa shule  shilingi bilioni 38.05.

“Mpango huu umechangia kuwepo kwa ongezeko la wanafunzi wanaoandikishwa mashuleni kutokana na kuondolewa kwa kikwazo cha ada na michango pamoja na kuongezeka kwa ufaulu katika shule za Serikali “ amesema Mhe. Jafo

Wakati huohuo, Mhe. Jafo ameongeza kuwa Serikali imetumia shilingi  bilioni 343.79  kwa ajili ya ujenzi na ukarabati wa Miundombinu  ya elimu ya shule za Msingi na Sekondari katika kipindi cha kuanzia Desemba 2015 hadi desemba 2019.

Aidha, kupitia mradi wa EQUIP Tanzania Serikali imetumia jumla ya shilingi bilioni 20.1 kwa ajili ya ujenzi wa vituo shikizi katika shule 251 vyenye vyumba vya madarasa 502, ofisi za waalimu 251, matundu ya vyoo, 1,382 na mataki ya maji 1,255.

Na. Angela Msimbira OR-TAMISEMI