Serikali Yatoa Agizo Kukamilisha Ujenzi wa Kituo cha Afya Kibaoni

Imewekwa tar.: July 22nd, 2022

Na Fred Kibano, Mpimbwe Katavi

Serikali imeagiza kukamilishwa kwa ujenzi wa kituo cha Afya kibaoni kilichopo Halmashauri ya Wilaya Mpimbwe ifikapo mwezi Septamba ili wananchi wa eneo hilo wapate huduma za afya karibu na makazi yao.

Makamu wa Rais wa Jamhuri ya Muungano wa Tanzania Mhe. Dkt. Philip Isdor Mpango ametoa agizo hilo baada ya kufanya ziara ya kikazi wilayani humo na kuweka jiwe la msingi la ujenzi wa kituo hicho hivi leo na kujionea hatua ya ujenzi iliyofikiwa na ndipo aliwataka watendaji kuongeza kasi ya ujenzi wa kituo hicho.

“dhamira ni ile ile, Mama Samia anachotaka ni kusogeza huduma karibu na wananchi, lakini nasisitiza tena madaktari, wahududumu wote wa afya mkawahudumie wananchi hawa kwa upendo, tumekubaliana na Naibu Waziri TAMISEMI mwezi wa tisa kukamilisha ile kazi ili tarehe 1 Oktoba mwaka huu kituo kianze kuhudumia wananchi” alisema Mhe. Dkt. Mpango

Akitoa salamu za mkoa wa Katavi, Mkuu wa Mkoa wa Katavi Mwanamvua Mlindoko amesema Ofisi yake inaahidi kuendelea kusimamia fedha za miradi ya Sekta zote kwani fedha za Tozo ya miamala ya simu pekee mkoa ulipokea shilingi Bilioni 13.08 ambazo pia katika Sekta ya Afya zimejenga vituo vya afya sita vilivyopata shilingi milioni 500 kila kimoja ambavyo vinaendelea kukamilika.

Naibu Waziri Ofisi ya Rais TAMISEMI Dkt. Festo Dugange amesema amepokea maelekezo ya Serikali kuhakikisha Kituo cha Afya Kibaoni kinakamilika mwishoni mwa mwezi wa tisa ili kianze kutoa huduma na kuondoa kero kwa wananchi kwenda kutibiwa umbali mrefu.

“Mhe. Makamu wa Rais, tumepokea maelekezo yako kwamba ifikapo tarehe 30 mwezi wa tisa mwaka huu kituo kile kiwe kimekamilika, naomba nikuhakikishie kuwa Ofisi ya Rais TAMISEMI tutahakikisha tunashirikiana na Mkoa na Halmashauri kuhakikisha kituo kile kinakamilika ifikapo tarehe 30 mwezi wa tisa” alisema Mhe. Dkt. Dugange.

Mbunge wa Jimbo la Kivuu Geophrey Pinda amesema Halmashauri ya Mpimbwe ilikuwa na lengo la kupeleka fedha kiasi cha shilingi milioni 589 kwa mwaka 2021/2022 kama asilimia 40 ya fedha za miradi ya maendeleo lakini hadi kufikia mwezi juni shilingi milioni 900 sawa na asilimia 166 zilipelekwa kwenye miradi mbalimbali  ya maendeleo katika Halmashauri hiyo.

Akisoma taarifa ya Kituo cha Afya Kibaoni Mganga Mkuu wa Halmashauri ya Wilaya ya Mpimbwe Dkt. Martin Lohay amesema ujenzi wa kituo hicho ulianza Septemba 2021 ambapo kituo kilipokea shilingi milioni 400 kutoka Serikali Kuu kwa ajili ya kujenga majengo matano ya wagonjwa wa nje, maabara, jengo la upasuaji, jengo la wazazi na jengo la kufulia.

Michango mingine ni pamoja na Mfuko wa Jimbo mifuko 100 yenye thamani ya shilingi milioni mbili, michango ya wananchi iliyolipa fidia ya eneo pamoja na kusogeza kokoto, mchanga na mawe na fedha za mapato ya ndani ya Halmashauri shilingi milioni 100 zilizotolewa kumalizia ujenzi kutokana na changamoto ya kupungua kwa fedha za mradi kutokana na gaharama ya vitu mbalimbali.

Dkt. Lohay amesema tayari Halmashauri imepokea watumishi wapya 8 na mahitaji yao ni 52 ili waweze kutoa huduma zote kwa mara moja kituoni hapo.

Naye Bwana Afya wa Halmashauri ya Wilaya ya Mpimbwe Ridhiwani Said amesema manufaa ya kituo hicho ni pamoja na wananchi kupata huduma karibu badala ya kwenda makao makuu Usevya Wilayani kutafuta huduma lakini pia kitapunguza gharama kwa wananchi ambao walifuta huduma mbali.