Serikali yatenga shilingi bilioni 270 kuboresha upatikana wa Dawa nchini

Imewekwa tar.: May 20th, 2021

Na Mathew Kwembe, Dodoma

Serikali imesema kuwa katika kipindi cha miaka sita iliyopita imeweza kuongeza bajeti ya bidhaa za afya kutoka shilingi bilioni 31 hadi shilingi bilioni 270 ili kuboresha upatikanaji wa dawa kwenye Vituo vya kutolea huduma za Afya nchini.

Kauli hiyo ya serikali inafuatia swali lililoulizwa na Mbunge wa viti Maalum Mhe. Grace Tendega ambaye alitaka kujua ni lini Serikali itahakikisha Sera ya Afya inatekelezwa bila tatizo lolote kwani kumekuwa na changamoto ya huduma za Afya katika Zahanati hasa ukosefu wa dawa pamoja na ukosefu wa huduma bure kwa wazee, watoto na akinamama wajawazito.

Akijibu swali hilo bungeni jana kwa niaba ya Waziri wa Nchi, Naibu Waziri Ofisi ya Rais Tawala za Mikoa na Serikali za Mitaa Mhe.Dkt Festo Dugange amesema kuwa ongezeko la bajeti hiyo ni la kwa kipindi cha kuanzia mwaka wa fedha 2015/16 hadi 2020/21.

Mhe. Dkt Dugange amesema kufuatia ongezeko hilo la fedha, hali ya upatikanaji wa dawa za msingi (tracer medicine) imeongezeka kutoka wastani wa asilimia 35 hadi asilimia 90.

Hata hivyo, Naibu Waziri amesema kuna changamoto ya upatikanaji wa dawa  za makundi maalum nje ya dawa za msingi (tracer medicine)  hasa katika ngazi ya Zahanati ambapo dawa nyingi zinazohusu magonjwa ya uzeeni zinaangukia kwenye kundi hilo.

Ili kukabiliana na changamoto hiyo, Mhe.Dkt Dugange amesema mwezi Mei 2021 Serikali imeipatia Wizara ya Afya, Maendeleo ya Jamii Jinsia, Wazee na Watoto Shilingi bilioni 80 kwa ajili ya kununua dawa kwenye Vituo vya kutolea huduma za Afya ya Msingi, dawa zitakazo nunuliwa zitapunguza  tatizo la dawa kwa kiasi kikubwa.

Naibu Waziri ameongeza kuwa serikali imeendelea kudhibiti mianya ya upotevu wa dawa ili kuhakikisha kuwa dawa zinazonunuliwa zinawanufaisha walengwa.