Serikali Yataka Wadau Kutumia Takwimu Sahihi

Imewekwa tar.: September 25th, 2018

Waziri wa Elimu Sayansi na Teknolojia Prof. Joyce Ndalichako amewataka baadhi ya Wadau kuacha kutoa takwimu za uongo hali wakipotosha Umma kwa kuwa zipo Mamlaka kisheria zinazotoa takwimu sahii za Taifa na kwamba atakayekiuka agizo hilo atachukuliwa hatua za kisheria.

Prof Ndalichako ameyasema hayo Jijini Dodoma leo wakati akifungua Mkutano wa pamoja wa mwaka kwa Wadau wa Mapitio ya Sekta ya Elimu nchini na kuwataka Wadau hao kuacha mara moja kupotosha jamii kupitia takwimu zisizo halisi.

Ndalichako amesema kuwa Sekta ya Elimu ni kipaumbele cha Serikali na ndio maana ruzuku ya elimu imetolewa kwa asilimia 100 na nyongeza juu yake, haiwezekani baadhi ya Wadau waseme bajeti ya elimu imeshuka kwa asilimia 56 wakati mpaka mwezi Juni, 2018 Serikali imepeleka fedha kufikia asilimia 86.5

Amesema Sekta ya Elimu imekuwa ikiimarika siku hadi siku kwani Serikali imeweza kupanga walimu kulingana na mahitaji, kujenga shule mpya, mafunzo ya walimu kazini, kujengewa uwezo kwa Wathibiti Ubora ili kuimarisha ufundishaji mashuleni ambapo jumla ya magari 45 yamenunuliwa na pia Waratibu Elimu Kata wamepatiwa pikipiki 2400 ili kufuatilia masuala ya elimu katika maeneo yao.

Kwa upande wake Naibu Katibu Mkuu (AFYA) Ofisi ya Rais TAMISEMI Dkt. Zainab Chaula, akitoa neno kwa niaba ya Katibu Mkuu Ofisi ya Rais TAMISEMI Mhandisi Mussa Iyombe kabla ya ufunguzi huo, amesema Serikali kupitia Ofisi ya Rais TAMISEMI inafanya jitihada za kupanua utoaji wa elimu bora katika ngazi ya elimu ya msingi nchini ili kuwawezesha Watanzania wote kupata elimu.

Dkt. Chaula amesema pia Serikali inatoa fedha za matumizi ya fidia kwa ajili ya Mpango wa Elimu Bila Malipo ambapo kila mwezi zinatolewa shilingi bilioni 22.2

“ili kugharamia elimu ya msingi Bila Malipo shilingi Bilioni 22.2 zinapelekwa mashuleni kila mwezi kwa ajili ya uendeshaji wa mashule, kufidia gharama za Elimu Bila Malipo ili kuimarisha upatikanaji wa elimu kwa Wasiojiweza, wasichana, yatima na makundi mengine ya wahitaji” alisema Chaula.

Chaula amesema kutoka mwaka 2015 hadi 2018 Serikali kwa kushirikiana na Wadau wa Maedneleo imetumia jumla ya shilingi 135,388,615,990.84 za Kitanzania kwa kujenga na kukarabati miundombinu ya shule za msingi na sekondari kupitia Programu mbili za EQUIP – T na EP4R ili kuboresha elimu nchini.

Aidha Serikali imefanya uboreshaji na ukuzaji wa ufundishaji na ujifunzaji wa masomo ya sayansi kwa kuajiri walimu wa sayansi na hesabu wapatao 5,628 kwa shule za sekondari lakini pia walimu 7,578 wa shule za msingi wameajiriwa ili kukabiliana na uhaba uliojitokeza.

Dkt. Zainab Chaula amesema kwa kuwa mazingira ya elimu na ajira yanabadilika na yataendelea kubadilika, mjadala wa pamoja kwa wadau wa elimu utazingatia namna ya kuboresha maisha ya mtu mmoja mmoja na wanafunzi ili waweze kupata ujuzi unaotakiwa.

Mkutano huo wenye ujumbe wa “Kutoa Elimu Bora Kwa Tanzania ya Viwanda” unalengo la kufanya mapitio ya Sekta ya Elimu kwa Pamoja, kufanya majadiliano kwa kina kwa mambo muhimu yatakayojitokeza kama changamoto na kuweka mipango na mikakati ya namna ya kukabiliana nayo.

Anaandika Fred Kibano - Ofisi ya Rais TAMISEMI