Serikali yapongeza ujenzi wa madarasa mkoa wa Geita

Imewekwa tar.: December 18th, 2021

Na Fred Kibano, Geita

Serikali imeridhika na ujenzi wa madarasa ya shule za sekondari mkoani Geita baada ya kukagua na kuona ujenzi kwa baadhi ya Halmashauri kufikia 95.

Pongezi hizo zimetolewa na Naibu Waziri Ofisi ya Rais TAMISEMI Dkt. Festo Dugange wakati akikagua ujenzi wa madarasa ya shule za sekondari za Lwezera, Bugando, Bugulula, Lutozo za wilaya ya Geita na shule za Shantamine na Geita sekondari pia baadhi ya mabweni yaliyopo Halmashauri ya Mji wa Geita.

Dkt. Dugange amesema Serikali imefanya kazi kubwa kwani kwa mkoa wa Geita pekee jumla ya shilingi Bilioni 17 na milioni 40 zilitolewa kwa ajili ya kujenga madarasa 742, vituo shikizi 102 na mabweni mawili ya wanafunzi.

“kwa mkoa wa Geita, ujenzi wa vyumba vya madarasa kwa shule za msingi na sekondari pamoja na mabweni kupitia Mpango wa Maendeleo kwa ustawi wa Taifa na Mapambano dhidi ya Uviko -19 zimetolewa shilingi Bilioni 17 na milioni 40”

Amezitaka Halmashauri za mkoa wa Geita, kukamilisha ujenzi wa madarasa kabla ya tarehe 30 Desemba, 2021 ikiwa ni pamoja na kuweka madawati kwenye madarasa Ili wanafunzi watakaoanza kidato cha kwanza kuanza masoma mapema mwezi januari 2022, lengo ni kuwa wanafunzi kuanza masomo siku moja badala ya kuwa na machaguo la kwanza la pili na la tatu.

Amezipongeza Halmashauri ya Wilaya Geita na Halmashauri ya Mji Geita kwa kutekeleza ujenzi wa vyumba vya madarasa ambapo Halmashauri ya wilaya ya Geita asilimia 85 na Halmashauri ya Mji Geita asilimia 95.

Akiwa katika sekondari ya Geita amesifu kazi nzuri ya mabweni na madarasa inayoendelea lakini ameagiza kukamilisha kazi hiyo kabla ya tarehe 30 Desemba mwaka 2021.

“kwa madarasa yaliyopata ajali ya moto na maabara mbili, Mkurugenzi utoe shilingi milioni 47 ili kukamilisha ujenzi kabla ya wanafunzi hawajaanza masomo mwezi januari, 2022” alisema Dkt. Dugange.

Dkt. Dugange ametoa maelekezo kwa mkoa kuongeza kasi ya ujenzi na kusimamia kasi ya ukamilishaji wa ujenzi ambao ni wastani wa asilimia 67 kimkoa inayotokana na baadhi ya Halmashauri kuchelewa ujenzi wa madarasa kutokana na sababu mbalimbali

Awali akisoma taarifa kwa Mgeni rasmi Kaimu Katibu Tawala wa mkoa amesema jumla ya wanafunzi 41,822 walifaulu mtihani wa darasa la saba ambao ni sawa na asilimia 79.21 ya wanafunzi 52,797 ya waliofanya mtihani mwaka 2021.

Naye Mkuu wa Wilaya ya Geita Mheshimiwa Wilson Shimo amesema watafanya kazi usiku na mchana ili kuhakikisha kazi ya ujenzi wa madarasa inakamilika lakini pia marekebisho yote ya utekelezaji wa mradi wa ujenzi ikiwemo kurudia utengenezaji wa madawati kwa kiwango kinachokubalika unakamilika kwa wakati.