Serikali yapongeza ujenzi wa madarasa Jiji la Mwanza

Imewekwa tar.: December 20th, 2021

Na Fred Kibano

Serikali imeridhika na hatua ya ujenzi wa madarasa 98 ya shule za sekondari za Halmashauri ya Jiji la Mwanza kwa kumaliza kwa wakati na kujengwa na thamani halisi ya fedha ujenzi ambao umegharimu shilingi Bilioni 1.96

Dkt. Dugange Naibu Waziri Ofisi ya Rais TAMISEMI ametoa pongezi hizo hivi leo baada ya kukagua ujenzi wa shule za sekondari za Pamba na Buchelele zote za Jijini Mwaza.

Amesema Serikali inawajali wananchi wa Mwanza wakiwemo wa Jiji la Mwanza na kwamba wameitendea haki fedha ya Serikali lakini pia wamekamilisha kwa wakati na kazi yao kuwa nzuri hali inayoashiria hakuna hata mwanafunzi mmoja ambaye atachelewa kuanza masomo kutokana na uhaba wa madarasa kwenye halmashauri hiyo ya Jiji.

Dkt. Dugange amesema mkoa wa Mwanza pekee ulipatiwa shilingi Bilioni 20 na milioni 500 kujenga vyumba vya madarasa na mabweni ambayo yanatakiwa kukamilika kabla ya Desemba 30, 2021 hali ukizingatiwa ubora na thamani ya fedha. Aidha, amesema Serikali ilitenga madarasa 12,000 kwa shule za sekondari na madarasa 3,000 kwa shule za msingi (vituo shikizi) ili kuinua kiwango cha taaluma na kufuta machaguo ya kwanza, pili na tatu kama ilivyozoeleka hapo awali.

Amepongeza ubunifu wa kujenga madarasa kwa mtindo wa maghorofa na kutumia mapato ya ndani kwa kuunga mkono juhudi za Serikali za kuboresha elimu kwani kazi za mapato ya ndani ni kutatua changamoto zinazowakabili wananchi.

Mkuu wa Wilaya ya Nyamagana Amina Makilagi ameipongeza Serikali chini ya Mhe. Rais Samia S. Hassan kutoa fedha nyingi ili kujenga madarasa lakini pia walikabiliwa na changamoto ya ufinyu wa ardhi na ardhi kuwa na mawe na miamba hali iliyopelekea kuamua kujenga maghorofa.

Mkurugenzi wa Jiji la Mwanza Sekiete Yahaya akitoa taarifa ya awali amesema kiasi cha fedha walizopata kimejenga madarasa ya shule za sekondari 98 ambapo madarasa 39 ni ya chini na madadasa 64 ni ya maghorofa ili kukabiliana na ufiyu wa nafasi hali iliyopelekea pia Halmashauri ya Jiji la Mwanza kutenga fedha za mapato ya ndani kiasi cha shilingi milioni 755.

Naye Mheshimiwa Diwani Kata ya Pamba amesema wazazi wengi hupenda kuleta watoto wao katika shule ya pamba na hivyo kusababisha msongamano na ndiyo maana Halmashauri ya Jiji wakaamua kutumia mapato ya ndani kuongeza nguvu kwenye ujenzi wa madarasa.