Serikali yapanga Mlima Nkongore uliopo Tarime mjini kuwa hifadhi

Imewekwa tar.: May 21st, 2021

Na Mathew Kwembe, Dodoma

Serikali imesema iliamua kuchukua ardhi ya Mlima Nkongore uliopo katika Halmashauri ya Mji Tarime kutoka kwa wananchi na kulipatia Jeshi la Magereza ili kuhakikisha kuwa eneo hilo linalindwa kwa mujibu wa Sheria ya Mazingira Namba 20 ya Mwaka 2004, hadi taratibu za kulifanya eneo hilo kuwa hifadhi zitakapokamilika

Akijibu swali lililoulizwa na Mbunge wa Tarime mjini  Mhe Mwita Kembaki Michael aliyetaka kujua ni Sheria ipi ambayo ilitumika kuchukua ardhi ya Mlima Nkongore kutoka kwa wananchi na kulipatia Jeshi la Magereza, Naibu Waziri Ofisi ya Rais TAMISEMI Mhe. David Silinde amesema kwa mujibu wa sheria hiyo, Kifungu cha 58 (1)-(2) kinazuia kufanya shughuli zozote zinazoweza kusababisha hifadhi ya mlima kuharibiwa.

Amesema uamuzi huo wa serikali umetokana na ukweli kuwa Wananchi wanaozunguka eneo hilo walikuwa wakiutumia Mlima Nkongore kwa shughuli mbalimbali za kiuchumi ikiwemo ukataji kuni, uchomaji mkaa na kilimo, shughuli ambazo zilikuwa zinahatarisha mazingira ya Mlima Nkongore.

Mhe Silinde ameeleza kuwa mwezi Novemba 2017 Kamati ya Ulinzi na Usalama ya Wilaya ya Tarime ilikabidhi eneo hilo kwa Jeshi la Magereza ili kuhakikisha kuwa eneo hilo linalindwa kwa mujibu wa Sheria ya Mazingira.

Amesema Halmashauri ya Mji Tarime kwa kushirikiana na Wizara ya Maliasili na Utalii, Wizara ya Ardhi, Nyumba na Maendeleo ya Makazi pamoja na Ofisi ya Makamu wa Rais-Muungano na Mazingira inakamilisha taratibu za kulifanya eneo la Mlima Nkongore kuwa hifadhi.