Serikali Yakabidhi hundi za Bilioni 2.3 kwa Vijiji 8 vinavyofanya biashara ya hewa ya Ukaa Tanganyika

Imewekwa tar.: July 24th, 2022

Na Fred Kibano, Tanganyika - Katavi

Makamu wa Rais wa Tanzania Mhe. Dkt. Philip Mpango amekabidhi mfano wa hundi zenye thamani ya shilingi Bilioni 2.3 kwa vijiji nane katika Halmashauri ya Wilaya ya Tanganyika kwa kufanya biashara ya hewa ya ukaa.

Mhe. Mpango amekabidhi mfano wa hundi hizo katika kijiji cha Katuma Halmashauri ya Tanganyika mapema leo na kuwaasa mikoa mingine kuiga mfano wa Halmashauri hiyo ili waweze kunufaika kiuchumi na kukabiliana na mabadiliko ya tabianchi.

Amewataka Watanzania kupanda miti kwa wingi na kuhifadhi misitu ili kupunguza hewa ya ukaa na kuongeza upatikanaji wa hewa safi lakini pia watakuwa wanafanya biashara ya hewa ya ukaa inayohimizwa na Jumuiya ya Kimataifa.

“tumekuwa na mikataba ya Kimataifa ambayo inahamasisha biashara ya hewa ya ukaa Duniani na hii inamaana kwamba tunapopanda miti na kuhifadhi misitu ambayo inatusaidia kufyonza na kupunguza hewa ya ukaa hewani tunalipwa, hii ndiyo kwa kifupi biashara ya hewa ya ukaa” alisema Dkt. Mpango.

Aidha, amemwagiza Waziri wa Nchi Ofisi ya Makamu wa Rais Mazingira kutoa elimu nchi nzima kuhusu biashara hiyo na kufanyia kazi mapungufu yote ya kisera na usimamizi wa biashara ya hewa ya ukaa ili wananchi waweze kunufaika zaidi.  

Mkuu wa Mkoa Katavi Mwanamvua Mlindoko amesema mkoa wa Katavi unayo misitu mikubwa 9, misitu 31 ya vijiji ambapo eneo lote la hifadhi ya misitu inayo takribani hekta 155,462 ambazo zinasaidia kuleta hali nzuri ya hewa na mvua. Pia ameahidi kusimamia sheria, kuhakikisha misitu inatunzwa na kusimamia uvunaji unaofaa pamoja na kuhamasisha wananchi kupanda miti kwa wingi.  

Akitoa salamu za Wizara, Mhe. Dkt. Festo Dugange Naibu Waziri Ofisi ya Rais TAMISEMI amesema Ofisi yake imezipokea changamoto za usafiri kwa Wakuu wa Wilaya za Tanganyika, Mlele na Mpanda na ameahidi kuzifanyia kazi ili Viongozi hao wawe na usafiri wa uhakika.

Kwa upande wake Mbunge wa Mpanda vijijini Mhe. Suleiman Kakoso ameiomba Serikali kutatua changamoto ya kuchukuliwa msitu waliokuwa wakiusimamia ambao wamepewa Taasisi ya TAWA wanaoshindwa kuusimamia msitu huo.

Akisoma taarifa ya Mradi wa Biashara ya hewa ya ukaa Mkurugenzi wa Halmashauri ya Wilaya ya Tanganyika Shaban Juma amesema Halmashauri yake inatarajia kupokea shilingi Bilioni 2.3, ambazo ni fedha zilizopatikana kipindi cha kuanzia Novemba, 2021 ikihusisha vijiji nane vya Lugomesi, Mwese, Lwega, Bujombe, Kapanga, Katuma, Mpembe na Kaguma.

Aidha, amesema mradi unahusisha misitu ya vijiji vyenye eneo la hekta 216,944 za ardhi na wakazi wapatao 34,242 wanaonufaika na mradi. Pia vijiji vitapata shilingi Bilioni mbili na milioni sabini sawa na asilimia 90 na Halmashauri ya Tanganyika shilingi milioni 230 sawa na asilimia 10.

Amesema pamoja na mafanikio ya mradi zipo changamoto kama uvamizi wa maeneo ya hifadhi, uchomaji moto, ukataji miti, uchungaji mifugo na uendeshaji shughuli za kibinadamu ndani ya hifadhi kama kilimo cha kuhamahama.

Biashara ya hewa ya ukaa ilianza rasmi mwaka 2018 na Halmashauri ya Tanganyika na Taasisi ya Carbon Tanzania kwa kushirikiana na Taasisi ya Tuungane ambapo mapato ya biashara hiyo yamekuwa yakipanda mwaka hadi mwaka.