Serikali Yaagiza Halmashauri 30 Kuhamia na Kujenga Miundombinu

Imewekwa tar.: February 11th, 2020

Serikali imeagiza Halmashauri 30 zilizotakiwa kuhamia katika makao yao ya kiutawala kujenga ofisi za utawala na kuzikamilisha kwa wakati ili kutoa huduma bora kwa wananchi.

Akitoa agizo hilo Katibu Mkuu Ofisi ya Rais TAMISEMI Mhandisi Joseph Nyamhanga wakati wa ziara yake wilayani Geita ambapo aliongea na watumishi na kukagua baadhi ya miradi ya maendeleo ameziagiza halmashauri 30 kuwa pamoja na kuitikia wito wa Mheshimiwa Rais Magufuli kuhamisha makao yao ya Halmashauri tangu Novemba 7, 2019 bado kuna changamoto ya mvutano wa kimaamuzi ni wapi makao makuu ya halmashauri yajengwe na hili linachelewesha huduma kwa wananchi.

“hakikisheni taratibu za eneo lililopendekezwa ujenzi wake unaanza mara moja ili muhamie kwa wakati hii ni pamoja na halmashauri nyingine 29 ambazo Mheshimiwa Rais Dkt. John Pombe Magufuli aliagiza tangu tarehe 7 Novemba, 2019”

Mhandisi Nyamhanga amesema pamoja na halmashauri hizo 30 kutii agizo la Mhe Rais Magufuli, halmashauri nyingi bado zimepanga kwenye majengo binafsi na wengine wapo katika ofisi za kata, shule, vituo vya afya, hospitali na majengo mengine kama magala ya chakula na kwamba hii haikubaliki kwani kuna baadhi ya halmashauri ambazo bado zina malumbano ya wapi majengo hayo ya utawala yajengwa.

Amesema agizo hilo ni la mara moja kwa halmashauri kuanza ujenzi na kukamilisha kwa wakati ili wananchi wafaidi matunda ya kupata huduma bora, karibu na kwa wakati lakini pia kutambua mipaka mipya ya kiutawala kwenye vitongoji, vijiji na wilaya ili kuandika hati za halmashauri.

Mhandisi Nyamhanga amezitaja baadhi ya halmashauri ambazo zimemaliza mchakato wa kutambua maeneo yao ya utawala na kuanza mchakato wa hati za halmashauri ambazo ni muhimu pia kwa ajili ya uchguzi mkuu wa 2020 kuwa ni pamoja na halmashauri za wilaya ya Mbulu (Manyara), Kibaha (Pwani), Handeni (Tanga), Uyui (Tabora) na Tanganyika (Katavi).

Wakati wa ziara hiyo Nyamhanga amekagua kituo cha afya Nzela ambacho kimepatiwa shilingi milioni 500 kwa ajili ya vifaa tiba na ukamilishaji wa majengo mengine ili kukipandisha hadhi kuwa hospitali ya wilaya ya Geita.

Mbunge wa Geita Joseph Musukuma ameomba kurejeshwa kwa shilingi milioni 293 ambazo zilirudishwa hazina kwenye mfuko mkuu wa Serikali baada ya kuvuka mwaka ili kumalizia baadhi ya kazi zilizobaki katika hospitali hiyo teule ya wilaya.

Kwa upande wake Katibu Tawala Mkoa Geita Dennis Bandisa amesema halmashauri ya wilaya ya Geita ina watu wapatao laki 9 lakini kimapato inazidiwa na halmashauri ya Mji Geita lakini pia kuna changamoto ya kiutawala katika Mji mdogo wa Geita ambapo Mtendaji wa kijiji ndiye anayefanya kazi kama Mkurugenzi wa Mji mdogo.

Naye Mkurugenzi Mtendaji  wa Halmashuri ya Wilaya ya Geita Bw. Ally Kidwaha amesema tayari wamepata eneo la ekari 400 kwa kushirikiana na Wadau wengine kujenga ofisi za halmashauri ya wilaya na kupima viwanja ili kuboresha makao ya halmashauri hiyo.

                      Anaandika Fred Kibano