Serikali, wadau wa maendeleo wajadili mikakati ya kuzuia maambukizi ya malaria

Imewekwa tar.: May 10th, 2019

Na Mathew Kwembe

Serikali imesema kuwa ili kukabiliana ipasavyo na maambukizi ya ugonjwa wa malaria nchini wadau wa maendeleo wanapaswa kushirikiana na serikali katika kutafuta raslimali fedha zitakazosaidia kuzuia mbu wanaoeneza malaria ndani na nje ya kaya.

Akifungua kikao cha siku moja baina ya serikali na wadau wa maendeleo wanaofadhili mpango wa kuzuia malaria nchini mjini Dodoma leo, Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia afya Dkt Dorothy Gwajima amesema ili nchi ifanikiwe katika vita dhidi ya mbu wanaoambukiza ugonjwa wa malaria hakuna budi kuwekeza katika kutafuta raslimali zitakazowezesha kutekeleza mpango wa kuua mazalia ya mbu.

Amesema utokomezaji wa mazalia ya mbu ni mpango wa serikali ya awamu ya tano na tayari Rais wa Jamhuri ya Muungano wa Tanzania Mheshimiwa Dkt John Pombe Magufuli amekwishaagiza kuwa dawa zinazotengenezwa katika kiwanda cha kuua wadudu kilichopo kibaha mkoani Pwani zinunuliwe na zisambazwe katika halmashauri zote 184 na mikoa 26.

“Changamoto iliyopo ni kuwezeshs raslimali stahiki kwa ajili ya kuwezesha kutekeleza mpango huu katika maeneo yote nchini,” amesema.

Kwa mujibu wa Dkt Gwajima ili kuweza kutekeleza mpango wa kutokomeza mazalia ya mbu nchi nzima kutahitajika fedha, pump za kupuliza dawa hizo kwenye mazalia na wataalamu wa kunyunyiza dawa hizo kwa ufanisi.

Amesema pamoja na kuwepo kwa juhudi za kuhakikisha kuwa kila kaya inatumia vyandarua vyenye dawa ili kukabiliana na mbu wakati wa kulala lakini serikali ya awamu ya tano imeweka kipaumbele cha kuhakikisha kuwa mazalia ya mbu yanatokomezwa katika mikoa yote 26 na halmashauri 184 nchini ili ifikapo mwaka 2020 na juhudi hizi zilenge kuwezesha kiwango cha maambukizo ya malaria kufikia chini ya asilimia 1 kutoka asilimia 7.3 hivi sasa.

Amesema kuwa wananchi wengi wamekuwa wakishambuliwa na mbu wakiwa nje ya nyumba zao hivyo hapana budi kuhakikisha kuwa mazalia ya mbu yanawekewa dawa walau mara moja kwa wiki ili kutokomeza wadudu hao wasiendelee kuzaliana na hivyo kuongeza kiwango cha maambukizo.

“Tayari serikali imekwishajenga kiwanda cha kutengeneza dawa za kuua mazalia ya mbu kilichopo Kibaha mkoani Pwani, hivyo ni matarajio yetu kuwa, juhudi za sasa zielekezwe katika kutafuta fedha kwa ajili ya kununua dawa hizo, pump za kunyunyizia pamoja na gharama za kuwezesha wataalam kutekeleza kazi hiyo,” amesema.

Kwa upande wake Meneja programu ya mpango wa taifa wa kuzuia Malaria Dkt Ally Mohamed amesema kuwa ili kuweza kutekeleza mpango huo kikamilifu wataalamu wa kunyunyiza dawa ya kuua mazalia ya mbu watapaswa kuifanya kazi hiyo kila wiki.

“Tunatarajia kila kata moja walau iweze kupata walau pump mbili za kunyunyizia dawa,” amesema.

Dkt Mohamed ameongeza kuwa tofauti na ilivyokuwa kabla sasa mbu wanauma zaidi nje ya nyumba kuliko ndani ya nyumba hali inayofanya serikali ya awamu ya tano kuweka msisitizo kwenye mbinu hii ya kuyatambua na kuyawekea mikakati ya kutokomeza mazalia ya mbu kama njia mojawapo ya kukabiliana na maambukizi ya malaria.

Naye Afisa msimamizi wa mradi wa kuzuia maambukizi ya Malaria Bwana Wilfred Mwafongo amesema kuwa takwimu zinaonyesha kuwa asilimia 77.7 ya mbu jike wanaambukiza ugonjwa wa malaria ndani na nje ya nyumba.

Hivyo bwana Mwafongo akataka juhudi za makusudi zifanyike katika kuhakikisha kuwa vita dhidi ya maambukizi ya mbu ifanyike ndani na nje ya nyumba ambapo ndani vitumike vyandarua vyenye viuatilifu na nje kuwepo na mpango wa kuua mazalia ya mbu kwa kunyunyiza dawa.

Awali Mratibu wa Malaria kutoka Ofisi ya Rais Tawala za Mikoa na Serikali za Mitaa Bibi Stella Kajange amesema kuwa lengo la serikali ni kupunguza kiwango cha maambukizi ya malaria kitaifa kutoka wastani wa asilimia 10 % kwa mwaka 2012 hadi chini ya asilimia 1% ifikapo Disemba 2020.

Dkt Gwajima amehitimisha kwa kutoa maelekezo kuwa, wataalamu wachanganue gharama zote za kuwezesha mpango huu ili, kila mdau apewe na achangie kwenye mpango huu kuendeleza pale tulipofikia sasa. Amesema, kikao cha Juni, 2019 kije na majibu ya utekelezaji.