SERIKALI KUJENGA UCHUMI SHINDANI

Imewekwa tar.: November 23rd, 2022

Na. Asila Twaha, OR- TAMISEMI

Kaimu Katibu Mkuu Ofisi ya Rais, Tawala za Mikoa na Serikali za Mitaa Mhandisi Gilbert Moga amesema Serikali kupitia mpango wa maendeleo awamu ya tatu wa miaka mitano 2021/22 hadi 25/26 kwa nia thabiti imekusudia kujenga uchumi shindani wenye kutoa huduma bora kwa jamii na kuwaletea maendeleo watanzania.

Moga ameyasema hayo Novemba 23, 2022 Dodoma wakati akifungua semina ya Fedha, Utawala, Bora na Uwajibikaji kwa Mamlaka Serikali za Mitaa kwa Chama cha Wahasibu Tanzania (TAA), iliyobeba kauli mbiu ya wajibikaji ni nguzo ya maendeleo ya Serikali za mitaa hivyo masuala ya rasilimali fedha, uwajibikaji wa serikali za mitaa katika kutoa huduma kwa wananchi, ni muhimu katika kuwahudumia wananchi.

Ameeleza kuwa, Serikali kupitia mpango wa maendeleo awamu ya tatu wa miaka mitano 2021/22 hadi 25/26 kwa nia thabiti imekusudia kujenga uchumi shindani wenye kutoa huduma bora kwa jamii na kuwaletea maendeleo watanzania.

Alisema Serikali imekusudia kuchukua hatua mbalimbali za kuboresha miundombinu ikiwemo ya usafiri, upatikanaji wa nishati, kuendelea kuimarisha mazingira ya ufanyajibiashara na uwekezaji ili kuwezesha ushindani wa sekta binafsi.

Moga amesema Rais wa Jamhuri ya Muungano wa Tanzania Mhe. Samia Suluhu Hassan ameonesha nia ya kutatua tatizo la huduma za jamii katika Mamalaka za Serikali za Mitaa, kwa kutoa kipaumbele cha fedha za miundombinu ya huduma za jamii ikiwemo afya, elimu ya msingi na sekondari na miundombinu muhimu ya barabara, katika sehemu mbalimbali hapa nchini.“

" Mfano kwa mwaka 2022/23 jumla ya Sh. trilioni 2.99 zimetengwa kwa ajili ya miradi ya maendeleo katika Halmashauri” amesema Moga

"Natoa wito  kuhakikisha fedha hizi zinasimamiwa ipasavyo na kuhakikisha thamani ya fedha inaonekana na miradi inakamilika  kwa wakati kama ilivyopangwa."

Aidha, Mhandisi Moga amesema  Serikali imeimarisha ukaguzi wa wakati hatua ambayo itapunguza upotevu wa mapato ya Serikali na kuongeza usimamizi madhubuti katika kusimamia fedha za miradi hasa fedha zinazopelekwa katika Mamalaka za Serikali za Mitaa kwa ajili ya utekelezaji wa miradi ya maendeleo.

"Ofisi ya Rais, TAMISEMI iko tayari kutoa ushirikiano Chama cha Wahasibu Tanzania katika masuala ya kifedha na maeneo mengine ambayo yatasaidia kuhakikisha wataalamu wetu wanajangewa uwezo kulingana na mabadliko ya tekinolojia."

Moga pia ametoa wito kwa wahasibu, maafisa manunuzi na maafisa mipango na wakaguzi wa ndani kuhakikisha wanatimiza majukumu yao kwa juhudi, weledi na uzalendo ili kuongeza tija katika maeneo yao ya kazi na kusaidia Taifa kuifikia malengo yaliyokusidia.

Kwa upande wa Kaimu Mkurugenzi Msaidia Idara ya Serikali za Mitaa upande wa fedha, Ummy Wayayu aliwataka wataalamu hao kuhakikisha wanatumia mafunzo waliyopata kuongeza tija na kuleta matokea chanya katika Serikali za Mitaa.

“ Kwa hiyo uwepo wenu hapa si wa kubahatisha ni uwepo sahihi kwa hivyo tunaimami mkishatoka hapa mtaenda kuleta matunda na matokeo chanya katika Halmashauri zetu.” amesisitiza Wayayu

Naye Rais wa Chama cha Wahasibu Tanzania (TAA), CPA Peter Mwambija ameishukuru Serikali kwa kuendelea kuweka mazingira mazuri kwa wafanya biashara lakini pia ameiomba Serikali kuendelea kuweka udhibiti wa upotevu wa fedha katika Mamlaka za Serikali za Mitaa.