SEQUIP kuwajengea uwezo walimu 40,000 wa masomo ya sayansi na hisabati

Imewekwa tar.: January 6th, 2025

Na Fred Kibano, Kagera

Serikali inaendelea kutoa mafunzo kwa walimu wa sekondari wanaofundisha masomo ya sayansi na hisabati 40,000 ili kuwajengea mbinu, maudhui na matumizi ya TEHAMA katika ufundishaji na ujifunzaji shuleni. 

Akifungua mafunzo hayo kwa niaba ya Naibu Katibu Mkuu Ofisi ya Rais TAMISEMI Atupele Ambwene katika Manispaa ya Bukoba mkoani Kagera leo tarehe 06.01.2025, Mkurugezi wa Idara ya Uratibu na Usimamizi wa Elimu Ofisi ya Rais TAMISEMI Dkt. Emmanuel Shindika amesema mafunzo hayo yataimarisha mchakato wa ufundishaji na ujifunzaji wa masomo ya sayansi kwa wanafunzi na walimu pamoja na Wathibiti ubora kufanya tathmini ya masomo hayo hapa nchini.

“Serikali kupitia Mradi wa SEQUIP imelenga kutoa mafunzo kwa walimu wanaofundisha masomo ya sayansi na hisabati wapatao 40,000. Mafunzo haya yatawezesha walimu kuimarisha mbinu, maudhui na matumizi ya TEHAMA ili kuboresha mchakato wa ufundishaji na ujifunzaji wa masomo ya hisabati na sayansi” alisema Dkt. Shindika.

Ameongeza kuwa hadi kufikia mwezi Disemba 2024, jumla ya walimu 29,328 wamekwishapatiwa mafunzo hayo ambapo katika awamu hii jumla ya walimu 7,940 Wathibiti ubora wa shule 159 kutoka katika mikoa 18 ya Tanzania Bara watapatiwa mafunzo hayo.

Kwa upande wake Afisa Elimu Mkoa wa Kagera Bw. Michael Ligola akitoa maelezo ya awali amewaasa washiriki kuzingatia mafunzo wanayopewa ili yakawasaidie katika ufundishaji na tathmini lakini pia alisema kwa mwaka 2024 mkoa wa Kagera umeongeza kiwango cha ufaulu ambapo kidato cha sita ufaulu ulikuwa asilimia 100, kidato cha nne (82%), kidato cha pili (72%), darasa la saba (72%) na darasa la nne (84).

Naye Mratibu Msaidizi Mradi wa SEQUIP Bw. Richard Makota amesema matarajio baada ya mafunzo ni kuwa na ufaulu mzuri wa masomo ya sayansi na hisabati, kuongeza matumizi ya TEHAMA shuleni katika ufundishaji na ujifunzaji, kuongezeka kwa umahiri wa mwalimu katika masomo hayo na ongezeko la wanafunzi katika elimu ya sekondari ya juu, vyuo vya kati na elimu ya juu katika masomo yanayoambatana na sayansi na hisabati.

Mafunzo hayo ya siku tano yanayotolewa kupitia Mradi wa Kuimarisha Elimu ya Sekondari unaotekelezwa na SEQUIP kwa pamoja kati ya Ofisi ya Rais TAMISEMI na Wizara ya Elimu, Sayansi na Teknolojia yana lengo la kuboresha mazingira ya kufundishia na kujifunzia katika shule za sekondari kuanzia kidato cha kwanza hadi cha sita kwa muda wa miaka mitano kuanzia 2021 hadi 2026.