"Rais wetu Ameweka Historia katika Afya" Waziri Jafo

Imewekwa tar.: May 11th, 2018

Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI) Selemani Jafo amewaeleza wananchi wa wilaya ya Karagwe mkoani Kagera kwamba Rais Dk.John Pombe Magufuli anaweka historia kubwa hapa nchini katika sekta ya afya kwa kuboresha vituo vya afya 208,  ujenzi wa hospitali mpya 67 kwa shilingi Sh.bilion 105  kwa mwaka 2018/19.

Sambamba na hilo, pia ameimarisha bajeti ya dawa kutoka sh.Bilioni 31 mwaka 2015 hadi sh. bilioni 269 kwa mwaka 2017/18.

Jafo ameyasema hayo leo hii alipokuwa akiweka jiwe la msingi katika kituo cha Afya Kayanga wilayani Karagwe ambacho ni miongoni mwa vituo 208 vinavyo boreshwa hapa nchini. 

"Historia inajengwa kwani tulikuwa tuna vituo vya afya 115 vilivyokuwa na uwezo wa kufanya upasuaji toka Uhuru, lakini kwa miaka miwili na nusu ya Rais Magufuli vituo 208 vitaweza kufanya upasuaji na hivyo kuwa na jumla ya vituo 323 vitakavyoweza kufanya shughuli ya upasuaji, amesema Jafo na kuongeza .

"Pia tulikuwa na hospitali 77 pekee tokea uhuru lakini mwaka huu OR TAMISEMI tumetenga shilingi  bilion 105 kwa kujenga hospitali mpya za wilaya 67 na karagwe ikiwemo,"amesisitiza Waziri mwenye dhamana na Wizara hiyo. 

Katika uwekaji wa jiwe hilo la msing  Wananchi wa wilaya ya Karagwe walijitokeza kwa wingi  licha ya uwepo na mvua inayo endelea kunyesha.