RAIS SAMIA AWEKA JIWE LA MSINGI UJENZI WA BARABARA YA KM 40 MUFINDI, IRINGA

Imewekwa tar.: August 11th, 2022

OR - TAMISEMI

Rais wa Jamhuri ya Muungano wa Tanzania Mhe. Samia Suluhu Hassan  ameweka Jiwe la msingi la ujenzi wa barabara ya Sawala - Mkonge - Iyegera - Lulanda yenye urefu wa Kilometa 40.7 inayojengwa kwa kiwango cha Lami katika wilaya ya Mufindi Mkoani Iringa. Leo 11 Agosti, 2022

Ujenzi wa barabara  hiyo unatekelezwa na Wakala wa Barabara za Vijijini na Mjini Tanzania (TARURA) chini ya mkandarasi Hematec Inverstment Ltd na G'S Contructors Co Ltd.

Rais Samia amesema katika mwaka wa fedha 2022/23 Serikali imeongeza Bajeti ya TARURA ili kujenga barabara vijijini na kuwezesha wakulima kufikisha mazao yao katika masoko kwa wakati.

Aidha, Rais Samia amepongeza amepongeza Mtendaji Mkuu wa Wakala wa Barabara  vijijini na Mijini (TARURA)  Mhandisi Victor Seff kwa kuendelea kusimamia vizuri miradi na fedha zote zinazopelekwa katika taasisi hiyo.

Ametoa wito kwa wanachi kuendelea kulipa kodi ili kuiwezesha Serikali kuendelea kuleta fedha nyingi kwa ajili ya kutekeleza miradi na kutatua kero za wananchi kwa wakati.

Akisoma taarifa ya ujenzi wa barabara hii Eng. Victor Seff amesema Barabara hiyo ni mojawapo ya barabara zilizochaguliwa chini ya Programu ya Agriconnect awamu ya kwanza kwa Wilaya za Kilolo (km 18.3) na Mufindi (km 30.3) kwa Mkoa wa Iringa zenye jumla ya km 48.6 na Mbeya vijijini (km 26.8) na Rungwe (km 12.2) kwa Mkoa wa Mbeya km 38.4.

Kilometa 30.3 kati ya km 40.7 zimeshawekwa tabaka la lami nyepesi na usanifu wa sehemu iliyobaki ya km 10.4 unaendelea na utakamilika Mwezi Oktoba 2022. Utekelezaji wa Sehemu iliyobaki utafanyika mwaka wa fedha 2023/24.

Jumla ya Shilingi 8,764,569,42.60 zimeshalipwa ambapo sehemu ya kwanza zimelipwa Shilingi 4,102,690,807.60 na sehemu ya pili zimelipwa Shilingi 4,661,878,613.

Mradi huu wa kimkakati una lengo kusaidia wakulima vijijini katika kuongeza/ kuimarisha Mnyororo wa thamani ya mazao yao hasa mazao ya Mbogamboga, Kahawa, Chai na mazao mengine yanayohitaji kusafirishwa kwa haraka toka Mashambani au katika maeneo ya uzalishaji hadi kufika Viwandani au katika masoko pasipo kupoteza ubora wake.