Programu ya Shule Bora yajengea Uwezo Maafisa Habari

Imewekwa tar.: October 5th, 2022

Na Fred Kibano, Kasulu-Kigoma

Programu ya Shule Bora imeendesha mafunzo kwa Maafisa Habari ili kuwajengea uwezo wa kuhabarisha na kuhamasisha Umma kimkakati kuhusu maendeleo yanayofanywa na Serikali.

Mafunzo hayo ya siku tatu yamefanyika katika Kasulu Mji mkoani Kigoma ambapo zaidi ya Maafisa Habari 26 wa Mikoa na Halmashauri kutoka mikoa ya Rukwa, Katavi na Kigoma wameshiriki.                                                                                                  

Akitoa mada wakati wa mafunzo hayo mjini Kasulu leo, Raymond Kanyambo Meneja Mawasiliano wa Cambridge Education ambayo inasimamia utoaji wa utalaamu kwa Programu amesema, Maafisa Habari wana uwezo mkubwa wa kuhamasisha na kuhabarisha Umma kuhusu malengo na ushiriki wao katika kuboresha elimu ikiwa watatumia vizuri ujuzi waliopatiwa pamoja na uzoefu wao.

"Mafunzo haya ni muhimu kwenu sana, na mkiongeza uzoefu wenu, bila shaka, Programu ya Shule Bora itafikia malengo yake haraka haraka", amesema Raymond.  

Naye Winfrida Bwire mshiriki wa mafunzo hayo ambaye pia ni Afisa Habari Wilaya ya Uvinza amesema mafunzo hayo yamenisaidia kupata uelewa mpana wa namna ya kuboresha ufanyaji kazi za mradi huo kwa kuzingatia malengo ya mradi ili kuweza kuboresha elimu ya msingi kwa kutatua changamoto za usambazaji taarifa kwa jamii.

Aidha, Afisa habari wa Halmashauri ya Mji wa kasulu Bi. Furaha Kimondo ameushukuru mradi wa shule bora na Ofisi ya Rais TAMISEMI kwa kutoa mafunzo kwani yatamuwezesha kufanya kazi kwa ufanisi.

Shule Bora ni Programu ya Elimu ya Serikali ya Tanzania inayolenga kuboresha elimu ya Awali na Msingi katika mikoa tisa ambayo inafadhiriwa na watu wa Serikali ya Uingereza kupitia shirika lake la misaada la UK aid.              

Mafunzo haya ni mwendelezo wa mafunzo mbali mbali ya kuimarisha uwezo wa wafanyakazi na wadau mbali mbali katika kufanikisha malengo ya Programu na Serikali kwa ujumla.

Mpaka sasa Maafisa Habari wanaotoka katika mikoa tisa inayotekeleza Mradi wa Shule Bora ya Dodoma, Singida, Simiyu, Mara, Pwani, Tanga, Katavi, Kigoma na Rukwa wamepatiwa mafunzo ili kuhabarisha Umma kwa weledi.