Pawaga Atoa Wosia Mzito kwa Ofisi ya Rais TAMISEMI

Imewekwa tar.: May 18th, 2018

Mkurugenzi wa Utawala na Rasilimali Watu Ofisi ya Rais, Tawala za Mikoa na Serikali za Mitaa (OR TAMISEMI) aliyemaliza muda wake katika Utumishi wa Umma Mohammed Pawaga amewataka watumishi wote wa umma kufanya kazi kwa kuzingatia utu.

Pawaga ameyasema hayo leo katika hafla fupi ya kumuaga iliyoandaliwa na watumishi wa idara, vitengo na Taasisi mbalimbali wa Ofisi ya Rais TAMISEMI iliyofanyika ndani ya ofisi hiyo.
Mbali na kumshukuru Mwenyezi Mungu kwa kumjaalia kufika hatua hiyo ya kustaafu kwa heshima lakini pia aliwaasa watumishi kutumia vyeo na madaraka yao katika kutatua changamoto za kazi kwa weledi.

“Kila mtu awe na ndoto ya kufika hapa, namshukru Mwenyezi Mungu kwa miaka 35 kuwa kazini kwani katika maisha kuna mambo mawili ambayo hayaepukiki ambayo ni kustaafu pamoja na kifo” Alisema Pawaga na kuongeza,

“Mambo haya yote yanahitaji maandalizi, kustaafu unatakiwa ujiandae mapema, kwamba kile ulichokipata unakitumiaje baadaye, na kifo unatakiwa ujiandae kwa matendo mema, nafurahi kuona nastaafu kwa amani” Alisema.

Alisema kiongozi yeyote anatakiwa kutengeneza viongozi na siyo wafuasi hata pale kunapotokea kutokuelewana inapaswa kutatua changamoto hiyo kwa kuzingatia utu jambo ambalo litakuongezea ujuzi na mafunzo katika utendaji wa kazi.

Aliwataka watumishi hao kutobadilika tabia baada ya kupata madaraka au pesa, kwani alisema vitu hivyo humbadilisha binadamu hivyo kuwashauri wale wenye vyeo kukumbuka walipotoka kabla ya kufanya maamuzi ili waweze kuwasaidia kila mmoja kwa kadiri wanavyoweza.

Akitoa salamu za pongezi za idara ya utawala na rasilimali watu mkurugenzi msaidizi wa utawala Mrisho Mrisho amempongeza Bw Pawaga kwa kuikuza TAMISEMI katika nyanja mbalimbali kama vile kuongeza vitengo, watumishi, upanuzi na ukarabati wa majengo pamoja na kuwepo kwa mazingira bora na rafiki ya kazi.

“Tunajivunia kuwa na wewe kwa miaka kumi uliyokaa hapa kwa sababu umechangia kuikuza TAMISEMI, ilikuwa chini na sasa ipo juu, umeanzisha vitengo vipya pamoja na taasisi mbalimbali sambamba na kuongeza idadi kwa watumishi” Alisema Mrisho

Mrisho amesema awali kulikuwa na watumishi 270 lakini kwa sasa wapo watumishi 658, lakini mbali na wingi huo lakini amesema Mkurugenzi huyo amewafundisha uwajibikaji jambo ambalo limesaidia watumishi kufanya kazi kwa umoja na kwa upendo wa hali ya juu.

Salamu kutoka Kitengo cha mawasiliano serikalini zilizotolewa na Fredy Kibano zilimuelezea Bw Pawaga kuwa ni kiongozi aliyefanikiwa kwa kiwango kikubwa kusimamia ukweli, haki na kutengeneza uwelewano ndani ya idara na vitengo vya TAMISEMI.

Mwenyekiti wa chama cha wafanyakazi Serikali Kuu TUGHE, tawi la TAMISEMI Jumbe Akida amesema kuwa Pawaga alijali stahiki za wafanyakazi bila kujali tofauti ya vyeo huku baadhi ya wawakilishi kutoka idara, vitengo na Taasisi mbalimbali zikimuelezea kama mtu aliyejali watu wote bila kuangalia umri wala madaraka.