Ondoeni vikwazo ujenzi Miradi ya Maendeleo – Prof Shemdoe

Imewekwa tar.: September 6th, 2021

Na Fred Kibano na Mathew Kwembe, Kilosa

Serikali imeagiza kuharakisha ujenzi wa vituo viwili vya afya vilivyopatiwa fedha mwaka huu 2021/2022 kiasi cha shilingi milioni mia tano pamoja na shule ya sekondari iliyopatiwa shilingi Bilioni moja mara ifikapo mwezi Desemba mwaka huu

Kauli hiyo imetolewa na Katibu Mkuu Ofisi ya Rais Tawala za Mikoa na Serikali za Mitaa (OR – TAMISEMI) Prof. Riziki Shemdoe wakati wa ziara yake Wilayani Kilosa hii leo.

Akiongea na watumishi wa kada mbalimbali katika Ukumbi wa Chuo cha Ualimu Ilonga Prof. Shemdoe amesema kumekuwepo na malumbano ya muda mrefu juu ya utekelezaji wa miradi ya maendeleo ikiwa ni pamoja na ujenzi wa shule ya sekondari iliyotolewa fedha shilingi Bilioni moja kutoka Serikali kuu na vituo viwili vya afya vilivyopatiwa fedha mwaka huu ambapo ujenzi wake bado haujaanza kutokana na sababu zisizo na msingi kama vile mchakato wa manunuzi.

“Ninamasikitiko kidogo Kilosa, tumeleta hapa fedha shilingi Bilioni moja kwa ajili ya kujenga shule ya sekondari , mmevutana sana  mpaka leo kazi haijaanza, Katibu Tawala Mkoa nakuomba hili ulisimamia kwa karibu mpaka Desemba tuje tuone progress (maendeleo) nzuri  shilingi Bilioni moja ipo kwenu imeshindwa kutumika. Tumeleta shilingi milioni mia tano kwa vituo viwili vya afya hilo na lenyewe lianze kufanyiwa kazi” alisema Shemdoe.

Aidha katika mwaka huu wa fedha amesema viomeongezwa vituo vya afya viwili kwa kuwa Halmashauri hiyo inayo majimbo mawili ya uchaguzi ambapo ameagiza fedha hizo shilingi Bilioni moja zianze kutumika mara moja ili huduma stahiki ziweze kutolewa kwa wananchi.

Amesema kero kubwa ambazo waliziwasilisha kwake ya uhaba wa watumishi kama Mhandisi na Mkaguzi wa ndani tayari wameshapelekwa na kwa sasa anaiangalia upya ofisi ya manunuzi kwa kuwa wanaonekana kama wanakwamisha michakato ya manunuzi wilayani humo.

Katika hatua nyingine Shemdoe amewataka Watendaji wa Kata na Maafisa Tarafa kusaidia kazi za ujenzi wa miradi ya maendeleo ili kufikia malengo ya kutoa huduma bora kwa wananchi na pia kama sehemu ya utawala bora pamoja na kuzingatia (force account) nguvu kazi ya jamii

Amekemea tabia za rushwa kwenye Halmashauri hiyo zinazofanywa na baadhi ya Maafisa ambapo barua zilizopitishwa na Ofisi ya Rais TAMISEMI zimekuwa zikitozwa kwa shilingi laki tano jambo ambalo alidokezwa na baadhi ya watumishi walioomba uhamisho wilayani hapo na kusisitiza kwamba jambo hilo halivumiliki na sheria zitachukuamkondo wake.  

Kwa upande wake Katibu Tawala Mkoa wa Morogoro Bi. Mariam Ntunguja amemshukuru Katibu Mkuu Ofisi ya Rais TAMISEMI Prof. Riziki Shemdoe kwa kupokea kero na ushauri wa watumishi pamoja na kujibu kero zao.

Naye Mkurugenzi wa Halmashauri ya wilaya Kilosa Bw. Kisena Mabuba amesema ukusanyaji wa mapato ya ndani katika halmashauri hiyo 2020/2021 ulikuwa ni asilimia 84 na kwa mwaka huu makusanyo wanatarajia kukusanya kwa asilimia 100 ijapokuwa hadi sasa makusanyo ya mwaka 2021/2022 ni asilimia pekee.