Nyamhanga azitaka Halmashauri Kuongeza kasi ya Ukusanyaji wa Mapato

Imewekwa tar.: February 12th, 2020

Serikali imezitaka halmashauri zote kukusanya mapato yao ya ndani na kupanga matumizi mazuri ya fedha za Serikali ambazo zinatokana na ruzuku ya Serikali, miradi ya maendeleo na fedha za ndani katika halmashauri husika.

Katibu Mkuu Ofisi ya Rais TAMISEMI Mhandisi Joseph Nyamhanaga  ametoa kauli hiyo wakati akiongea na watumishi wa halmashauri ya wilaya ya Chato na kisha kukagua miradi ya maendeleo inayotekelezwa mpaka kwenye halmashauri hiyo.

Mhandisi Nyamhanga amesema halmashauri hazina budi kuongeza kasi ya ukusanyaji wa mapato ya ndani badala ya kutegemea fedha za ruzuku ya Serikali kutoka Serikali Kuu lakini pia kupanga matumizi mazuri ya fedha hizo kama yalivyopangwa kwenye bajeti zao ikiwa ni pamoja na fedha za miradi ya maendeleo na zile za Serikali Kuu.

Amesema jumla ya mashine za kielekitroniki 7,227 zimemesambazwa kwenye halmashauri mbalimbali nchini kwa ajili ya kuboresha ukusanyaji wa mapato, ugawaji uliokwenda sambamba na uwezo wa halmashauri katika kukusanya mapato na mkoa wa Geita ulipata mashine hizo 25.

Kwa mujibu wa Mkurugenzi wa halmashauri ya Wilaya ya Chato Eliud Mwaitekeleke hadi kufikia Desemba 2019 halmashauri ilikuwa imekusanya asilimia 49.04 na mwezi Januari, 2020 wamefikia asilimia 50.

Wakati huo huo Nyamhanga amekagua ujenzi wa kituo cha mabasi makubwa na madogo cha Chato kinachogharimu shilingi Bilioni 6.1, mradi unaojengwa na Mkandarasi M/S Mayanga Contractors Co. Ltd wa Jijini Mwanza na kuagiza Mradi huo ukamilike kwa wakati na kuacha kuweka visingizio vya hali ya hewa (mvua).

“kupitia mradi huu wa kimkakati utasadia kuongeza uwezo wa halmashauri katika kuongeza mapato hivyo ukamilike kwa wakati mwezi machi kama ilivyokuwa imepangwa”    

Akiongea kwa niaba ya Mkurugenzi wa halmashauri ya Chato, Meneja wa TARURA Chato Mhandisi Chacha Petro amesema hali ya mvua na kuchelewa kwa kubuni michoro ni baadhi ya changamoto zilizochelewesha mradi huo kuendelea.

Mwananchi wa Chato Bahati Petro amesema mradi huo ni mzuri na wa mafanikio utawasaidia wananchi kupata ajira na kuboresha usafiri hasa sehemu ya kupaki na kupanda magari kwa wasafiri na wananchi.

                    Anaandika Fred Kibano