Naibu Waziri ataka majengo ya hospitali Gairo yakamilike kwa wakati

Imewekwa tar.: June 21st, 2021

Na Mwandishi wetu, Morogoro

Naibu Waziri Ofisi ya Rais TAMISEMI Dkt. Festo John Dugange amewaagiza Viongozi wakuu wa Halmashauri ya Wilaya ya Gairo kuhakikisha wanasimamia kwa ukaribu utekelezaji wa miradi ya maendeleo wilayani humo kwani inatakiwa kukamilika katika muda uliopangwa.

Mhe Dkt Dugange ametoa agizo hilo Juni 20, mwaka huu wakati alipokutana na Viongozi wa Wilaya, Watendaji wa Halmashauri pamoja na watumishi wa Idara ya Afya wakati akikagua ujenzi wa majengo saba ya Hospitali ya Wilaya ya Gairo na ujenzi wa boma kwenye zahanati ya Mogohigwa iliyopo kata ya Chigela.

“Nakuagiza Mkurugenzi ukishirikiana na Mwenyekiti wa Halmashauri, hebu kasimamieni kwa ukaribu miradi yote na mhakikishe inakamilika kwa wakati ili wananchi waanze kunufaika na huduma tulizo kusudia hususani kwa hii miradi ya ujenzi wa Hospitali ya Wilaya na zahanati mpya ya Mogohigwa, lakini pia hata kwa miradi ya urekebishaji miundo mbinu kwenye zahanati za zamani,” amesema.

Amefafanua kuwa ni lazima pawepo na usimamizi mzuri wa matumizi ya fedha zinazotolewa na Serikali Kuu kwa ajili ya uboreshaji wa huduma za afya kupitia miradi ya ujenzi wa Hospitali za Wilaya, uboreshaji wa miundominu kwenye kituo cha afya na zahanati pamoja na ujenzi wa zahanati mpya ili thamani ya pesa ilingane na ubora wa majengo yaliyopo na miundo mbinu mingine.

"Mkurugenzi hili nalo ni muhimu sana kulizingatia, Serikali inaleta fedha nyingi kwa ajili ya sekta ya afya, lengo ni kuhakikisha Wananchi wake wananufaika na ubora wa huduma, hivyo thamani na ubora wa majengo pamoja na miundo mbinu yake lazima ilingane kabisa na thamani ya fedha zilizotumika,” amesisitiza Naibu Waziri.

Dkt Dugange amesifu kasi ya ujenzi wa Hospitali ya Wilaya na kueleza kuwa juhudi za Halmashauri zinaonekana ingawa kulikuwa na kasoro ndogondogo ambapo alielekeza kasoro hizo zirekebishwe haraka katika kipindi cha mwezi mmoja ili huduma zianze kutolewa hususani jengo la maabara ifikapo Julai 20, 2021.

“Umaliziaji siyo mzuri sana, nadhani kulikuwa na shida katika usimamizi kwa mafundi mliowapa kazi hii na hapa jicho langu lipo kwa Mkurugenzi kama msimamizi Mkuu, Mganga Mkuu Wilaya na Mhandisi wa ujenzi mmeonyesha udhaifu, ingawa ninawapongeza kwa kasi nzuri ya ujenzi na majengo ni mazuri lakini umaliziaji wake kidogo bado sijaridhishwa nao,” ameeleza.

Aidha Dkt. Dugange  amemwagiza Mkurugenzi wa Halmashauri Bi Agnes Mkandya pamoja na Mweka Hazina Wilaya kusimamia kikamilifu ukusanyaji wa mapato ya ndani na kuhakikisha wanafikia lengo la 100% ifikapo juni 30, 2021 kabla ya mwaka mpya fedha 2021/2022 kuanza.

“Suala la makusanyo kwa Gairo bado mpo chini sana ni 67% tu ya lengo, naagiza pia lipewe uzito zaidi ili kufikia Juni 30, mfike lengo la 100%,” alisema na kuongeza:

 “Kupitia makusanyo ya ndani mtakuwa na nguvu ya kujiendesha bila kuwa na utegemezi kutoka Serikali kuu, pia itasaidia kuimarisha miundombinu katika utoaji hudumwa kwa jamii.”