Mweli awatega Wakuu wa Shule, Walimu Wakuu kwenye Mfumo wa PREM/PREMS.

Imewekwa tar.: January 10th, 2021

Na Atley Kuni, Bariadi- SIMIYU

Naibu Katibu Ofisi ya Rais – TAMISEMI (anayeshughulikia Elimu), Bw. Gerald Mweli, amewaweka katika Sintofahamu ya kupata fedha za Elimu bila malipo, walimu Wakuu na Wakuu shule wote nchini watakaoshindwa kuingiza taarifa za wanafunzi kwenye Mifumo ya kusajili wa wanafunzi ili kuwatambua kwa majina na mahali kata ilipo na  Shule wanazosoma.

Akizungumza katika kikao cha pamoja na Waratibu Elimu kata, Wakuu wa Shule na Walimu Wakuu katika Halmashauri ya Mji wa Bariadi mkoani Simiyu, amesema imefika wakati taarifa zote za wanafunzi ziwepo kwenye Mfumo na kushindwa kufanya hivyo ni kuihujumu na kugomea maelekezo ya Serikali.

"Nililisema hili nikiwa wilayani Ukerewe, narudia tena hapa Bariadi, shule zitakapofunguliwa tarehe 11 Januari, 2021. Watoto wote wawe wamesajiliwa, kinyume na hapo Serikali haitatoa fedha za Elimu bila Malipo". Amesema Mweli

Mifumo ya PREM/PREMS ina uwezo wa kumtambulisha Mwanafunzi kwa majina yake, Shule anayosoma pamoja na picha yake, Aidha Mfumo unauwezo wa kurahisisha zoezi la uhamaji kwa wanafunzi kutoka Shule moja kwenda nyingine.

Mweli amesema, faida ya uwepo wa Mifumo mbalimbali imewezesha masuala ya Uhamisho lakini pia imesaidia kupunguza uwepo wa wanafunzi hewa.

"Katika kipindi cha huko nyuma kabla ya uwepo wa Mifumo, tulikabiliwa na kadhia ya uwepo wa wanafunzi hewa lakini tangu tuanze kutumia Mifumo suala hilo sasa limekuwa historia na litaendelea kuwa historia tutakayoizika kwenye kaburi la sahau". Amesisitiza Mweli.

Katika hatua nyingine, Naibu katibu Mkuu Mweli, amesema Serikali itaendelea kuimarisha Mifumo ya TEHAMA kwakuwa imeonesha kuwa na tija na ufanisi uliotarajiwa

"Kama Serikali tunajitahidi kwenda na mahitaji ya wakati, huko nyuma tulikuaa tukipokea Madeni mengi ya watumishi walimu, lakini mwaka huu tumekuja na mfumo wa MadeniMIS,  mfumo huu tayari umeanza kufanya kazi na sasa mnautumia, lengo letu likiwa ni kwenda kwa watumishi wote wa umma, lakini tumeanza na walimu kwakuwa ndio wanaobeba idadi kubwa ya watumishi takriban ni asilimia 71 ta watumishi wote." alisema Mweli, na kuongeza kuwa, kutokana na somo walilopata kwakuombwa viambata mara kwa mara ndio maana wakaamua kuja na suluhu yakudumu" alisisitiza Mweli.

Mfumo wa MadeniMIS  utamwezesha Mtumishi kufatilia na kutambua hatua mbali mbali za deni lake lilipofikia, lakini pia kuwa na umadhubuti katika kutunza nyaraka mbali mbali kwa umakini mkubwa, lakini kuepusha kuombwa viambata mara kwa mara.

Naibu Katibu Mkuu yupo katika ziara ya kikazi kukagua shughuli mbali mbali za kielimu lakini pia kuzungumza na watumishi wa Kada hiyo kwa lengo la kujua fursa na changamoto walizonazo.