Mtaala Mpya utafanya wahitimu kuwa na ushindani Duniani – Balozi Charlotta Marcias

Imewekwa tar.: November 21st, 2024

Na Fred Kibano, Mara

Balozi wa Sweden nchini Tanzania Mheshimiwa Charlotta Ozaki Marcias ameiasa Serikali ya Tanzania kuendelea kufanya maboresho ya elimu hususani mitaala ili kuhakikisha wanafunzi wanaopitia katika Mfumo huo wanakuwa wavumbuzi, wataalam wabobezi na Viongozi wa Taifa lijalo.

Mheshimiwa Marcias ameyasema hayo leo tarehe 21 Novemba, 2024 Manispaa ya Musoma mkoani Mara wakati wa ziara yake ya kujionea maendeleo ya miradi ya GPE LANES II na Lipa Kulingana na Matokeo (EP4R) inayofadhiliwa na baadhi ya nchi za Umoja wa Ulaya zikiwemo Sweden na Uingereza.

“nahimiza Serikali ya Tanzania kutenga walau asilimia 20 ya bajeti ya Taifa kwenye elimu ili kusaidia kufanya maboresho muhimu hususani mtaala. Kwa kuelimisha watoto wa leo, tutakuwa tunatengeneza nguvu kazi ya kesho ambayo itasaidia ukuaji wa uchumi, maendeleo ya kijamii na ushindani Duniani” alisema Mheshimiwa Charlotta Marcias.

Akitoa neno kabla ya kumkaribisha Mheshimiwa Balozi Charlotta Marcias, Mkuu wa Mkoa wa Mara Mheshimiwa Kanali Evans Mtambi alisema Mkoa wa Mara unafarijika kuwapokea wageni hao kwani wamekuja kujionea msaada waliowapatia watu wa Mkoa wa Mara lakini amewahakikishia Wadau hao kuwa wamekuwa wanatumia fedha zinazotolewa zinatumika kama ilivyopangwa na wataendelea kufanya hivyo kulinda thamani ya fedha.

Aidha, amesema Sera nzuri ya diplomasia anayoifanya Mheshimiwa Dkt. Samia Suluhu Hassan kuwa na uhusiano mzuri na mataifa mengine ndiyo matunda yake lakini pia amewaalika Wadau hao na wengineo kwenda kuwekeza mkoani humo kwani kuna vitu vingi vya kuwekeza.

Balozi Charlotta Marcias ametembelea Kituo cha Walimu (TRC) Mwembeni Kata ya Mwigobero kilichokarabatiwa na kuwekwa samani kwa shilingi 22,000,000 kwa fedha za GPE LANES II na kupatiwa vifaa mbalimbali vya TEHAMA pia alitembelea shule ya sekondari ya ufundi Musoma iliyopatiwa shilingi 75,000,000 ambazo zilitumika kujenga madarasa mawili na kuweka samani.

Kwa upande wake Naibu Katibu Mkuu anayeshughulikia Elimu, Wizara ya Elimu, Sayansi na Teknolojia Dkt. Mahera Wilson Charles alisema Wizara yake imefanya maboresho ya mtaala mpya lengo likiwa ni kuhakikisha Watoto wote wa kitanzania wanasoma katika mazingira mazuri hivyo uwepo wa Wadau hao ni muhimu katika kuunga mkono juhudi za Serikali kufikia malengo yake.

Naye Mkurugenzi Msaidizi anayeshughulikia Elimumsingi ofisi ya Rais TAMISEMI, Suzan Nussu ambaye amemwakilisha Naibu Katibu Mkuu (ELIMU) Atupele Mwambene amewashukuru Wafadhiri hao kwa kuendelea kujitoa kuunga jitihada za Serikali katika kuboresha elimu nchini hususani miradi ya GPE LANES II na Lipa Kulingana na Matokeo (EP4R).

Mkoa wa Mara ulipokea fedha za kujenga miundombinu mbalimbali shilingi 4,512,786,000 (EPforR) tangu 2019/2020, shilingi 2,717,795,040 (GPE LANES II) na mwaka 2024/2025 unatarajia kupokea shilingi 3,399,600,000 (GPE TSP) kwa ajili ya Kuboresha Kada ya Ualimu.