Msiwe kikwazo kwa watumishi wapya- Mweli

Imewekwa tar.: January 9th, 2021

Na Atley Kuni, Ukerewe, MWANZA

Naibu Katibu Mkuu Ofisi ya Rais-TAMISEMI (anaye shughulikia elimu), Gerald Mweli, amewataka walimu wakuu, wakuu wa shule na maafisa elimu kata kote nchini kuhakikisha hawatengenezi  mazingira ya walimu wapya kuchukia vituo vya kazi.

Mweli ametoa kauli hiyo alipokuwa akizungumza na Wakuu wa Shule, Walimu wakuu na waratibu elimu kata, wilayani Ukerewe mkoani Mwanza, anasema watendaji hao wanawajibu wa kuwapokea   na kuonesha moyo wa ukarimu walimu wanaopangiwa kufanya kazi katika maeneo yao na si kutengeneza mazingira yatakayowafanya wachukia vituo kazi.

Anasema  moja ya vyanzo vinavyochangia baadhi ya watumishi walimu kuomba uhamisho ni pamoja na vikwazo na manyanyaso wanayo fanyiwa na baadhi ya viongozi wao wanaowakuta vituoni.

“ Ndugu zangu lazima tufahamu kuwa tunao wapokea kazini wengine ni watoto wetu kutokana na kuhitimu masomo yao wakiwa bado na umri mdogo hivyo suala la kuwakarimu na kuwatunza ni muhimu sana, ili mtumishi aweze kuyafurahia maisha ya kazi.

Kwa upande wao walimu na waratibu elimu  wanaiomba serikali, kuona uwezekano wa kuajiri walimu  wa maeneo husika ili kuepusha watumishi kuomba uhamisho wa mara kwa mara.

Ombi hilo lilitolewa na mwalimu wa Shule ya Sekondari ya Mibugo, Mtesigwa Bulega wakiwasilisha sehemu ya hoja zao mbele ya Naibu Katibu Mkuu.

Aidha, akijibu hoja hiyo, Mweli anasema katika wakati mfupi ujao Wizara itakamilisha mfumo wa uhamisho na hivyo itakuwa ndio suluhu yakudumu.

Bulega pia  anaiomba serikali kuona umuhimu wa uwepo wa shule maalum ya bweni kwaajili ya wanafunzi wenye mahitaji maalum.

hata hivyo Mweli , aliwahakikisha viongozi hao atalifikisha  katika mamlaka zingine ili suluhu ipatikane.

Akihitimisha kikao hicho, Naibu Katibu Mkuu Mweli amewaagiza, Wakuu wa Shule hao na waratibu elimu kata, kuhakikisha wanatumia mfumo wa PREM na PREMS kama ilivyo elekezwa ili kuweka kumbukumbu na taarifa za wanafunzi kwenye utaratibu unao kubalika.

“Tarehe 11 Januari, 2021, shule zitakapokuwa zinafunguliwa, taarifa zote ziwe katika utaratibu unaotakiwa, kushindwa kufanya hivyo tutahesabu unataka kutengeneza wanafunzi hewa” amesisitiza Mweli.

Kwa upande wake Mkuu wa Wilaya ya Ukerewe,  Mh. Cornel Magembe, akitoa amewapongeza waalimu wote kwa ujumla katika wilaya ya Ukerewe kwa juhudi wanazoendelea kufanya katika kunyanyua hali ya elimu kwani ni kwa miaka miwili mfululizo matokeo ya mitihani Wilaya imeshika nafasi ya nne (4) kati ya nane (8) za kimkoa.

Magembe amewasihi kuhakikisha kuwa walimu wote watakao pangiwa  kufanya kazi katika Wilaya yaUkerewe watakutana na mazingira rafiki ya wao kuishi na kufanya kazi kwa ufanisi mkubwa. “mazingira yetu sio mabaya kama wengi wanavydhani bali ni kwasababu tu tupo kisiwani”

Naye Mkurugenzi Mtendaji wa Halmashauri ya Ukerewe, bi Ester Chaula ameahidi kuendelea kushirikiana na walimu wakuu, wakuu wa shule, maafisa elimu kata lakini pia na watumishi wote watakao pangiwa wilayani ukerewe.

MWISHO