Mil. 6 Kutengwa kusaidia watu wenye mahitaji maalum Kisarawe

Imewekwa tar.: May 22nd, 2018

Waziri wa Nchi Ofisi ya Rais Tawala za Mikoa na Serikali za Mitaa ambaye pia ni Mbunge wa Kisarawe, ameishauri Halmashauri ya Kisarawe kutenga kiasi cha tsh. Mil.6 kwaajili yakuwahudumia watu wenye mahitaji maalum kwenye Wilaya hiyo.

Neema hiyo na ushauri huo umetolewa  wakati wa zoezi la ugawaji wa vifaa saidizi kwa watu wenye ulemavu vilivyo tolewa na shirikisho la watu wenye ulemavu nchini (SHIVYAWATA).

Katika hafla hiyo ya ugawaji vifaa saidizi,  Waziri wa Nchi, Ofisi ya Rais, TAMISEMI Selemani Jafo  ambaye pia ni mbunge wa wilaya hiyo ya Kisarawe ametangaza neema hiyo kwa walemavu hao kwa kumtaka Mkurugenzi wa Halmashauri ya Kisarawe kufanya utaratibu wa kupata Sh.milioni 6 kutoka mapato ya ndani ili kuwalipia CHF iliyo boreshwa kwa vikundi 207 vya walemavu.

Jafo amesema lengo ni walemavu wote wa wilaya hiyo wawe na uhakika wa kupata huduma za afya ambapo kwasasa wilaya ya Kisarawe ina jumla ya watu wenye ulemavu  wapatao 1608.

“ Ndugu Mkurugenzi Halmashauri ya wilaya ya Kisarawe haiwezi kushindwa kupata sh.milioni 6 ili kuwalipia walemavu ni rai yangu kupitia mapato ya ndani mliwezeshe kundi hili mahsusi.

Baada ya maelekezo hayo,  Mkurugenzi wa Halmashauri ya wilaya ya Kisarawe Mussa Gama amemthibitishia Waziri Jafo kuwa watahakikisha wanatekeleza agizo hilo kabla mwezi Juni 2018.

Katika hatua nyingine, Mkuu wa mkoa wa Pwani Eng. Ndikilo amemuagiza Katibu Tawala wa mkoa wa Pwani  Zuberi Samataba  awaandikie wawekezaji wote wa viwanda wa mkoa wa Pwani waone namna watakavyoweza kuchangia vifaa saidizi cha walemavu ili walemavu wengine waliobaki waweze kusaidiwa vifaa hivyo wezeshi.

Naye, Mkuu wa wilaya ya Kisarawe Mhe. Happiness Seneda ameitaka jamii kushirikiana ili kuwasaidia watu wenye ulemavu wilayani Kisarawe.

Share

Wilaya ya Kisarawe huenda ikawa wilaya ya mfano hapa nchini kwa wananchi wake wote wenye ulemavu kupatiwa bima ya afya iliyoboreshwa.