Mikopo ya Sh. Milioni 850 yatolewa kwa Vikundi 104 jijini Tanga

Imewekwa tar.: February 15th, 2021

Na Tussa Mwambenja, Tanga

Halmashauri ya Jiji la Tanga imetoa mikopo yenye thamani ya sh.850,343,274 kwa vikundi 104 vya wanawake, vijana na walemavu ikiwa ni kutekeleza agizo la serikali kwa kila halmashauri nchini kutenga asilimia 10 ya mapato yake ya ndani kwa mwaka wa fedha 2019/2020.

Mkurugenzi wa Jiji hilo Daudi Mayeji amesema fedha hizo zimetolewa kwa Vikundi 73 vya wanawake, 25 vya vijana na 6 vya watu wenye ulemavu.

Kikundi cha Winners Women Group ni miongoni mwa vikundi 73 vilivyonufaika na mikopo hiyo kwa upande wa wanawake ambapo kwa mujibu wa Mwenyekiti wa Kikundi hicho Fatuma Sheshe, amekiri kikundi chake kupokea kiasi cha sh. milioni 20 ili kuongeza uzalishaji wa bidhaa za ujasiriamali kama ufugaji nyuki, ufugaji wa kuku, kutengeneza batiki, sabuni za maji na kikoba.

Amesema kikundi hicho chenye wanachama 30 wote wakiwa wanawake kwa sasa kina mtaji wa sh. milioni 47 unaokiwezesha kikundi kuendesha shughuli zake kwa ufanisi mkubwa huku kikiweza kurejesha shs.16,000,000 kati ya shs.20,000,000 ilizokopa na hivyo kubakia na deni la sh milioni nne tu.

“Tunaishukuru sana Serikali kwa kutuunga mkono wanawake pale tunapoonyesha juhudi kwani kwakweli tunasomesha watoto, tumeboresha biashara zetu za mtu mmoja mmoja kwasababu tumeongeza mitaji yetu,” amesema.

Kwa upande wake mweka hazina wa kikundi hicho Fatuma Mshote ameelezea furaha yake kwa kikundi chao kupata mkopo kwani umewasaidia sana kujiinua kiuchumi na akaomba serikali kuwaongezea muda wa marejesho kwani muda wa sasa ni mdogo.

Vijana ambao ndio tegemeo la Taifa nao hawakuachwa nyuma katika mikopo hii ili waweze kujenga Taifa lenye Uchumi wa kati lakini lenye nguvu na ubunifu mkubwa, tuelekee kwa Vijana wa pale Mwakidila.

Mwakidila Chapakazi Youth Group ni kikundi cha Vijana kilichoanzishwa 2015 kilichopo kata ya Tangasisi mtaa wa Mwakidila B, kikiwa na wanachama 11 wa kike wakijishughulisha na ufyatuaji wa matofali na kilimo cha matunda hususani Tikiti.

Mwakidila Chapakazi walikuwa na mtaji wa shs.5,200,000 wakakopeshwa na Halmashauri shs.10,000,000 ambazo wameziendeleza kwenye kilimo kwa kununua shamba la heka moja lililopo Chongoleani, pamoja na kuajiri vijana wenzao wengine 10 katika ufyatuaji wa matofali, Mwenyekiti wa kikundi hiki Nasibu Musa amesema mkopo walioupata umeleta mafaniko makubwa sana kwao, kwani sasa wanakikundi wana viwanja ambavyo kila mmoja amenunua kama faida yake binafsi lakini pia wanasomesha watoto na wadogo zao Sekondari.

“ Kupitia mkopo huu tumenunua shamba heka 1 Chongoleani, kwa shughuli zetu hizi tumeweza kununua viwanja na kusomesha wanetu na wadogo zetu sekondari, binafsi nikisikiaga wimbo wa Magufuli jembe uwa nafurahi sana sababu ujembe tumeuona kupitia Halmashauri yetu ya jiji maana wengi wetu tumetoka chuo tukaona tujiajiri na Maisha yanasonga,” amesema Musa

Kikundi kingine kilichonufaika na mikopo ya asilimia 10 ni TAYOTAI, hiki ni kikundi cha vijana wa kike kinachojishughulisha na ushonaji wa nguo za aina mbalimbali, ambacho kinapatikana kata ya Makorora eneo la Community Center kama Tanga Youth Tailoring (TAYOTAI).

Kikundi hiki ambacho kimenufaika na mkopo unaotolewa kwa vijana, kimesajiliwa 2019 kikiwa na jumla ya wanakikundi 32, na kimepata mkopo wa shs.100,000,000 ambao ulitumika kununua Vyerehani za kisasa vinavyotumia umeme na kuanzisha mtaji wa shughuli za Ushonaji kama Sare za Shule, Manesi, pia kushona nguo za mitindo mbalimbali yenye ubunifu.

“Tunapenda kuendelea kuishukuru serikali kwa mkopo waliotupatia sisi vijana wa kike ambao wengi wetu tuna umri kuanzia miaka 19 mpaka 35, tulikuwa tunakaa tu nyumbani bila shughuli yoyote ile hali iliyokuwa inatupelekea kuwa wake za watu katika umri mdogo na kuwa tegemezi kwa wazazi, lakini sasa tuna ofisi ambayo tumepewa na jiji, pia tuna ujuzi  wa kushona kwa mashine ya kudarizi ambao tumeongezewa na Serikali kupitia Halmashauri ya jiji la Tanga, kiasi tumekuwa tukipata tenda katika baadhi ya shule na vituo vya Afya kama Galanos sekondari, kituo cha Afya Duga, Mikanjuni, Makorora, na Masiwani,” alisema Fatma Amiri Katibu wa kikundi

Tanga One Youth ni miongoni pia mwa vikundi vya vijana vilivyonufaika na mikopo inayotolewa, kikundi hiki kilipata mkopo wa sh 182,000,000, mkopo ambao umetolewa kwa vijana 70 wanaojishughulisha na usafirishaji wa abiria maarufu kama “Bodaboda” ambapo fedha ya mkopo ilitumika kununua pikipiki 70 pamoja kulipia bima, kununua mafuta ya kuanzia na vibali vyote vinavyohusika.

Tanga Viziwi Group ni kikundi kimojawapo cha watu wenye ulemavu kati 6 ambacho kinapatikana Makorora, kimesajiliwa mwaka 2018 kikiwa na wanachama 8, kikijishughulisha na utengenezaji wa Samani, kupiga picha za mnato na ufundi wa umeme, kuchomelea mageti.

Katika mwaka wa fedha 2020/2021, halmashauri ya jiji la imetenga kiasi cha shs. 1,225,305,864 kwa ajili ya kutoa mikopo kwa vikundi ambapo katika robo ya kwanza Julai hadi Septemba, Halmashauri imetoa mikopo yenye jumla ya sh228,500,000, huku vikundi 29 vya wanawake kiasi cha sh 167,000,000, vikundi 7 vya Vijana sh 48,000,000 na Vikundi 2 vya watu wenye ulemavu sh13,500,000, huku ikiendelea na mchakato wa kukamilisha utoaji wa mikopo kwa robo ya pili Oktoba hadi Desemba 2020/2021 kiasi cha sh 300,000,000 ambayo ilitolewa mwishoni mwa mwezi Januari 2021.