MIKATABA YA UTEKELEZAJI MRADI WA UENDELEZAJI WA JIJI LA DAR ES SALAAM DMDP 2 YASAINIWA

Imewekwa tar.: May 30th, 2023

OR - TAMISEMI

Waziri wa Nchi, Ofisi ya Rais, Tawala za Mikoa na Serikali za Mitaa(TAMISEMI), Mhe. Angellah Kairuki akiwa na Waziri wa Fedha na Mipango, Mhe. Mwigulu L. Nchemba (Mb) wameshuhudia utiaji saini wa mikataba ya kusanifu Mradi Uendelezaji wa Mkoa wa Dar es Salaam awamu ya pili (DMDP 2) unaotarajiwa kuanza kutekelezwa Aprili 2024 na utagharimu Shilingi Bilioni 800.

Mikataba hiyo imesainiwa kati ya Ofisi hiyo na Wakandarasi wanaosanifu mradi huo ambao ni Mhandisi Consultancy LTD & Luphan (Halmashauri ya Temeke na Kigamboni), Nimeta Consultancy LTD (Halmashauri ya Kinondoni na Ubungo) na UWP Consultancy LTD(Halmashauri ya Dar es Salaam).

Akizungumza leo tarehe 30 mei 2023 jijini Dodoma baada ya kushuhudia utiaji saini huo, Waziri Kairuki amewataka Wakandarasi hao kuzingatia masharti ya mikataba yao na wasiwe kikwazo kwenye utekelezaji wa mradi huo.

Amesema ofisi yake itahakikisha utekelezaji huo unakuwa na mafanikio makubwa na kuonya dosari zilizojitokeza kwenye awamu iliyopita zisijirudie.

“Mradi huu unakwenda kutatua kero mbalimbali ikiwamo ujenzi holela wa makazi, miundombinu duni ya usafiri, mabadiliko ya tabia nchi kwa jiji la Dar es Salaam zinazosababisha mafuriko na utupaji taka ngumu ovyo,”amesema Kairuki 

“Wabunge wa maeneo husika hakikisheni mnasimamia halmashauri zenu ili utekelezaji wa mradi huu uwe na mafanikio na kusiwepo dosari, TAMISEMI tutakuwa makini kuhakikisha kwamba mradi huu awamu ya pili unatekelelezwa kwa mafanikio makubwa, tunaamini tutakuwa tumejifunza kupitia utekelezaji wa awamu ya kwanza,”amesema Kairuki 

Kwa Upande wake, Waziri wa Fedha na Mipango, Mhe. Dkt. Mwigulu Nchemba amesema mradi huo ulikuwa kilio kikubwa kwa wabunge wa Mkoa wa Dar es Salaam ambao kila bajeti walikuwa wakisimama kuhoji.

Awali, akitoa maelezo ya mradi huo, Mratibu wa miradi ya serikali kupitia mikopo ya Benki ya Dunia, Tamisemi na Tarura, Mhandisi Humphrey Kanyenye, amesema asilimia 74 ya fedha hizo zitatumika kwenye miundombinu ya barabara, mifereji, maeneo ya wazi, masoko, vituo vya mabasi, kurekebisha miundombinu ya taka ngumu.

Mwenyekiti wa wabunge wa Mkoa huo, Mbunge wa Kigamboni, Dkt. Faustine Ndugulile ameomba viporo vya DMDP awamu ya kwanza vikamilike.

Mwenyekiti wa Kamati ya Bunge ya Tawala za Mikoa na Serikali za Mitaa, Mhe. Denis Londo, amesema mradi huo umesubiriwa sana na utiaji saini unatimiza kiu ya wananchi na wabunge wa Dar es salaam.