Mhandisi Nyamhanga apongeza ujenzi wa wodi ya wazazi Mvomero

Imewekwa tar.: March 15th, 2020

Na. Angela Msimbira Mvomero

Katibu Mkuu Ofisi ya Rais Tawala za Mikoa na Serikali za Mitaa Mhandisi  Joseph Nyamhanga ameupongeza  uongozi  wa Mkoa wa Morogoro kwa usimamizi mzuri wa ujenzi wa wodi ya Wazazi  iliyojengwa katika Hospitali ya Wilaya ya Mvomero, Mkoani Morogoro.

Ameyasema hayo leo wakati alipofanya ziara katika Hospitali hiyo ambayo ilipatiwa shilingi milioni 500 kwa ajili ya ujenzi wa wodi hiyo ili kuongezea baadhi ya miundombinu kutokana na uhitaji mkubwa wa Hospitali hiyo.

Mhandisi Nyamhanga  amesema kazi iliyofanyika ni nzuri kulingana na fedha zilizotolewa kuakisi  uzuri wa  jengo hilo ambalo  kwa sasa limeanza  kutoa  huduma kwa wananchi wanaozunguka eneo hilo na wale wa  jirani  jambo ambalo lilimepunguza changamoto kubwa ya wananchi kupata huduma hiyo mbali na maeneo yao

 “Serikali ilitoa shilingi milioni 500 kwa  ajili ya kuongeza miundombinu katika  hospitali hii baada ya kuona majengo yaliyopo hayatoshi hivyo kinachotakiwa kwa hivi  sasa ni kuongeza vifaa na vifaa tiba  ili wananchi waweze kupata huduma bora  na zenye viwango vya Hospitali ya Wilaya” Amesisitiza Mhandisi Nyamhanga.

Amesema Serikali itahakikisha inaweka  vifaa na vifaa tiba vinapatikana kwa wakati ili jengo la wodi ya wazazi lililokamilika na kuanza kutoa huduma liwe na vifaa vyote vinavyohitajika  ili kuweza kuwasaidia  wakinamama wajawazito wanaokuja kupata huduma katika Hospitali hiyo.

Amesema kuwa Serikali katika mwaka wa fedha 2019/2020 imetenga shilingi milioni 500 kwa ajili ya kuongeza miundombinu  kwenye   Hospitali ya Wilaya  zote nchini, hivyo ameutaka uongozi huo kuhakikisha wanasiamami fedha  hizo ili ziweze kutumika katika kazi iliyopangwa na majengo hayo yaweze kukamilika  kabla ya tarehe 30,juni,2020.

Mhandisi Nyamhanga amewaagiza Waganga Wakuu wa Mikoa na Wilaya kuhakikisha wanasimamia huduma zinazotolewa kwa wananchi katika Hospitali za Wilaya na Vituo vya kutolea huduma ili wananchi waweze kuvutiwa na  huduma za afya zinazotolewa na Serikali.

Hata hivyo Nyamhanga amesisitiza kuwa  Serikali inatumia fedha nyingi kwa ajili ya kununua dawa kwa ajili ya  Vituo vya Afya na Hospitali lakini bado kuna upotevu wa dawa katika vituo hivyo, Nawaagiza kuhakikisha mnasiamamia kwa weledi upotevu wa dawa ili kupunguza changamoto ya upungufu wa dawa katika vituo vya kutolea huduma

“Simamieni watumishi wenu wa kada ya afya waweze kutoa huduma bora za afya, pia kupunguzeni  tatizo la wizi wa dawa kwenye vituo vya kutolea huduma jambo hili linarudisha nyuma juhudi za Serikali za kuhakikisha wananchi wanapata huduma bora za afya.

Kwa upande wake Katibu Tawala Mkoa wa Morogoro Mhandisi Emmanuel Kalobelo ameipongeza Serikali ya Awamu ya Tano ya Mheshimiwa Rais Dkt. John Pombe Joseph Magufuli kwa kusema wataendelea kutekeleza maagizo ya Serikali na  Mkoa wamejipanga kukamilisha kazi za ujenzi wa hospitali za wilaya ya mvomero ili kuboresha utoaji wa huduma bora kwa wananchi.

Naye Mkurugezi wa Halmashauri ya Wilaya ya Mvomero Florent Kyombo amesema kuwa ujenzi wa wodi ya wazazi  umekamilika   na kuanza kutoa huduma ya  kujifungua tangu januari, 2020 na mpaka sasa   wakinamama 25 wamepatiwa huduma hiyo.