Mapinduzi Makubwa Bajeti za Halmashauri 2018/2019

Imewekwa tar.: March 2nd, 2018

Akielezea mara baada ya kukamilika kwa uchambuzi wa bajeti, Mkurugenzi wa Tawala za Mikoa Ofisi ya Rais TAMISEMI, Ndugu Beatrice Kimoleta alisema kuwa hii ni mara ya kwanza kwa Mamlaka ya serikali za Mitaa kufanya Bajeti kwa njia ya Kieletroniki ikiwa ni utekelezaji wa agizo la Mheshimiwa Waziri Mkuu.

“Itakumbukwa kuwa wakati Mheshimiwa Waziri Mkuu akizindua Mfumo wa Uandaaji wa Mipango na Bajeti kwa Mamlaka za Serikali za Mitaa (PlanRep) mwezi Septemba, 2017 aliagiza kwamba bajeti zote za Halmashauri za mwaka wa fedha 2018/2019 zitumie mfumo mpya wa PlanRep iliyoboreshwa. Hivyo, huu ni utekelezaji wa maagizo ya Mheshimiwa Waziri Mkuu.” Amenukuliwa Kimoleta.

Mmoja ya Wakufunzi wa timu ya uchambuzi wa bajeti, Allan Bendera ambaye ni Mchumi kutoka idara ya Mipango na Sera Wizara ya TAMISEMI alisema kwamba mfumo huo mpya umesaidia kupunguza gharama za fedha ambazo zilikuwa zikitumika wakati wa uchambuzi wa bajeti.

“Gharama ni moja ya jambo ambalo limepunguzwa sana kupitia uchambuzi wa bajeti kwa njia ya kielektroniki kama ilivyokusudiwa hapo awali. Lakini pia, mfumo umeokoa muda mwingi uliokuwa ukitumika wakati wa mapitio ya bajeti kwa kiasi kikubwa.” amesema Bendera.

Bajeti hiyo ambayo kwa mujibu wa Mchumi Willison Gwoma, kutoka Wizara ya TAMISEMI  inakadiriwa kufikia kiasi cha Shilingi trilioni 6 na imewashirikisha wanachi kwa kuzingatia misingi ya utawala bora.

Akitoa salaam kwa timu iliyokamilisha uchambuzi wa bajeti Ndugu Samson Hango, kutoka Idara ya Elimu Wizara ya TAMISEMI aliomba baadhi ya changamoto zilizojitokeza hususan katika sekta ya elimu zifanyiwe maboresho.

“Tunaomba katika mwaka ujao wa maandalizi ya bajeti, Wataalam walioandaa mfumo waboreshe Majedwali ya takwimu za kielimu ili kurahisisha uingizaji wa bajeti za sekta hiyo” amesema Hango.

Suala la maandalizi ya mipango na bajeti kwa njia ya kielektroniki ni utekelezaji wa agizo la Waziri Mkuu wa Jamhuri ya Muungano wa Tanzania, Mheshimiwa Kassim Majaliwa Majaliwa (Mb)  wakati akizindua mfumo wa PlanRep iliyo boreshwa 5 Septemba, 2017 ili kuondokana na matumizi makubwa ya rasilimali muda, fedha pamoja na shajala ambazo zilikadiriwa kufikia wastani wa Shilingi bilioni 4