Makatibu Tawala wa Mikoa na Wakurugenzi wa Halmashauri waaswa kusimamia Programu za Elimu ya Watu Wazima

Imewekwa tar.: October 10th, 2024

Na Fred Kibano, Tabora

Serikali imewataka Makatibu Tawala wa Mikoa na Wakurugenzi wa Halmashauri nchini kusimamia Programu za Elimu ya Watu Wazima ili kuongeza maarifa, ujuzi na stadi zitakazowasaidia wananchi kujikwamua kiuchumi.

Kauli hiyo ya Serikali imetolewa leo tarehe 10 Oktoba, 2024 Manispaa ya Tabora katika ukumbi wa Ofisi ya Mkuu wa Mkoa wa Tabora na Katibu Mkuu Wizara ya Elimu, Sayansi na Teknolojia Prof. Carolyn Nombo wakati akifungua Kongamano la Wadau wa Elimu ya Watu Wazima na Elimu Nje ya Mfumo Rasmi ambapo ametoa wito kwa Viongozi hao kusimamia Programu za Elimu ya Watu Wazima ili kuleta maendeleo kwa wananchi.

“ninaomba Viongozi na Wadau kushiriki kikamilifu katika programu mbalimbali za Elimu ya Watu Wazima na Elimu Nje ya Mfumo Rasmi ili kupata maarifa, ujuzi na stadi mbalimbali kwa lengo la kujiletea maendeleo, nawaomba Makatibu Tawala wa Mikoa na Wakurugenzi wa Halmashauri zote nchini kusimamia programu mbalimbali za Elimu ya Watu Wazima na Elimu Nje ya Mfumo Rasmi zinazotekelezwa katika maeneo yenu” alisema Prof. Carolyn Nombo.

Amezitaja baadhi ya Programu hizo kuwa ni pamoja na Mpango wa Uwiano wa Elimu ya Watu Wazima na Jamii (MUKEJA), Mpango wa Elimu Changamani kwa Vijana (MECHAVI au IPOSA), Mpango wa Elimu ya Msingi kwa Walioikosa (MEMKWA) na Vituo vya Wazi vya Ujifunzaji (Open Learning Centres) kwa elimu ya sekondari.

Aidha, Prof. Nombo amesema Sera ya Elimu na Mafunzo ya mwaka 2014 Toleo la 2023 inasisitiza unyumbufu wa elimu na elimu bila ukomo inayozingatia matumizi ya Sayansi na Teknolojia katika juhudi za maendeleo binafsi, jamii na Taifa kwa ujumla hivyo ni vema Viongozi wote kuisimamia.

Kwa upande wake Mwl. Ernest Hinju Mkurugenzi Msaidizi Elimu ya Watu Wazima, Elimu Maalum, Elimu nje ya Mfumo Rasmi na Michezo alisema katika miaka mitatu sasa Elimu ya Watu Wazima inafanya vizuri nchini kwani idadi ya wanaofanya mitihani na kufaulu imeongezeka kama MEMKWA lakini pia inasaidia kuleta maendeleo ya jamii hususani katika uchumi, ushirika na kilimo.

Akitoa neno la shukrani Mwenyekiti wa Maafisa Elimu Watu Wazima Mkoa wa Iringa Martha Luambano amesema kikao kazi cha siku mbili chini ya Ofisi ya Rais TAMISEMI na kongamano chini ya Wizara ya Elimu, Sayansi na Teknolojia vitawasaidia kufanya tathmini ya majukumu yao na wataweza kuendesha Programu za Elimu ya Watu Wazima kwa ufanisi kwenye maeneo yao pamoja na kuisambaza kwa jamii.

Maadhimisho ya juma la Elimu ya Watu Wazima hapa nchini huadhimishwa kila mwaka katika ngazi ya Taifa, Mkoa na Wilaya kwa kushirikisha Wadau na Taasisi mbalimbali zinazotekeleza programu za Elimu ya Watu Wazima na Elimu Nje ya Mfumo Rasmi ili kubaini changamoto na namna ya kukabiliana nazo. Kaulimbiu ya mwaka 2024 ni “Ujumuishi katika Elimu bila Ukomo kwa Ujuzi, Ustahimilivu, Amani na Maendeleo”