Mafunzo haya yakaimarishe mahusiano na wananchi - Ahmed

Imewekwa tar.: August 8th, 2024

Na OR TAMISEMI, Ruvuma

Mkuu wa Mkoa wa Ruvuma Mheshimiwa Ahmed Abbas Ahmed amefungua mafunzo ya siku mbili kwa Maafisa Tarafa na Watendaji wa Kata kwa Mkoa wa Ruvuma na kuwataka washiriki hao kutumia mafunzo hayo Kwenda kuboresha mahusiano ya kiutendaji kazini. 

Kauli hiyo ameisema leo tarehe 08/08/2024 Mkoani wa Ruvuma alipokuwa akifungua mafunzo yanayotarajiwa kufanyika kwa siku mbili kwa Maafisa Tarafa na Watendaji wa Kata katika Mkoa wa Ruvuma. 

“Mafunzo haya yatawasaidia wale watumishi wa zamani na watumishi walioajiriwa hivi karibuni katika utekelezaji kazi katika maeneo yenu ya kazi na yataboresha mahusiano mazuri kati ya wananchi na Serikali yao” alisema Mheshimiwa Ahmed.

Mhe. Ahmed aliwashukuru Maafisa Tarafa wa Mkoa wa Ruvuma kwa kuwawakilisha na kuwasaidia Waheshimiwa Wakuu wa Wilaya katika majukumu yao ya kila siku hususani kuhamasisha wananchi kushiriki katika shughuli za maendeleo na kuwa kiungo bora kati ya Serikali Kuu na wananchi.

Aidha, Mhe. Ahmed aliwaasa washiriki wa mafunzo kutumia muda wao vyema ili kupatiwa mafunzo yatakayowasaidia kutatua migogoro ya wananchi, kuboresha ufuatiliaji na usimamizi wa miradi inayotekelezwa kwenye maeneo yao na kuboresha maadili ya kiutumishi.

 Naye Simon Maganga mwakilisha Katibu Mkuu, Ofisi ya Rais TAMISEMI alimshukuru Mkuu wa Mkoa wa Ruvuma kwa kutenga muda wake na kufungua mafunzo hayo muhimu ambayo yanafanyika kwa siku mbili mkoani Ruvuma.

Kwa upande wake Bi. Salma Mapunda, Afisa Tarafa ya Songea amesema mafunzo hayo yatamjengea uwezo na kumkumbusha kutekeleza majukumu yake ya kila siku na kuwafanya wananchi kuwa karibu na Serikali yao.

Kufunguliwa kwa mafunzo haya ni muendelezo wa utoaji wa mafunzo kwa Maafisa Tarafa na Watendaji wa Kata kwa Mikoa yote 26 Tanzania Bara na tayari mikoa 20 imeshapatiwa mafunzo haya yanayotolewa na Ofisi ya Rais TAMISEMI kupitia Programu ya Uimarishaji wa Tawala za Mikoa na Serikali za Mitaa (Regions and Local Government Strengthening Programme-RLGSP), kwa kushirikiana na Chuo cha Serikali za Mitaa Hombolo na Chuo cha Utumishi wa Umma.