MAENEO YA SHULE YALIYOTENGWA KWA AJILI YA MICHEZO YALINDWE NA KUTOBADILISHWAWA MATUMIZI - NDEJEMBI

Imewekwa tar.: June 26th, 2023

Naibu Waziri Ofisi ya Rais, Tawala za Mikoa na Serikali za Mitaa Mhe Deogratius Ndejembi amewaagiza wasimamizi wa elimu nchini kuhakikisha maeneo ya Shule yaliyotengwa kwa ajili ya michezo yanalindwa na kutokubadilisha matumizi.

Mhe. Ndejembi ametoa agizo hilo mkoani Tabora wakati wa ufungaji wa Mashindano ya Umoja wa Mchezo na Sanaa shule za Sekondari Tanzania (UMISSETA) na Umoja wa Michezo na Taaluma kwa Shule za Msingi Tanzania (UMITASHUMTA) yaliyofanyika Mkoani Tabora

“Kuna maeneo ambayo yalitengwa kwa ajili ya viwanja vya michezo lakini, maeneo hayo yamebadilishwa matumizi na kujengewa shule mpya,hivyo nikuagize Katibu Mkuu Ofisi ya Rais TAMISEMI Adolf Ndunguru kuhakikisha mnafanya tadhimini ya maeneo yote yaliyotumika ili waweze kutafuta mbadala wa kuwa na maeneo ya michezo katika maeneo hayo” amesisitiza Mhe Ndejembi 

 Mhe. Ndejembi amesema uboreshaji wa miundombinu ya michezo iende sambamba na suala zima la usafi na uhifadhi wa mazingira kwa kuhakikisha miti inapandwa kuzunguka viwanja vya michezo ili kuleta vivuli na hewa safi kwa wanamichezo.

Aidha, Mhe Ndejembi amewataka wasimamizi wa elimu nchini kuhakikisha ratiba za michezo shuleni zinazingatiwa ili kuwapa wanafunzi muda stahiki wa kushiriki katika michezo hali itakayopelekea kuibua na kuendeleza vipaji vyao. 

Vilevile, amewataka kuhakikisha wanashirikiana na wadau wengine wa michezo kubuni na kuandaa mipango ya kuwaendeleza vijana wenye vipaji katika michezo na pia kuwapa motisha wanafunzi wanaoshiriki na kufanya vizuri katika michezo na sanaa.

Naye Makamu Mwenyekiti wa Kamati ya Bunge TAMISEMI, Mhe. Lazaro Justin Nyamoga (Mb) amezitaka Halmashauri zote nchini kuhakikisha zinatenga bajeti ya kutosha kwa ajili ya michezo ya UMITASHUMTA na UMISSETA kuanzia ngazi ya Kata.