Maafisa Utumishi Waaswa Kuacha Urasimu kwa Walimu

Imewekwa tar.: August 11th, 2020

Na. Fred Kibano

Serikali imewaagiza Maafisa Utumishi katika Mamlaka za Serikali  za Mitaa nchini kuacha mara moja kuwazungusha walimu kwa kutokuwa wazi kwenye masuala ya kiutumishi yakiwepo uhamisho na maslahi mbalimbali kwani ni kinyume na sheria ya Utumishi wa Umma.

Hayo yamesemwa na Naibu Katibu Mkuu anayeshughulikia Elimu Ofisi ya Rais TAMISEMI Bw. Gerald Mweli wakati akiongea kwenye kikao maalum cha Maafisa Elimu wa shule za Msingi na Sekondari, Maafisa wa Tume ya Utumishi wa Walimu, Maafisa Elimu Kata, Wakuu wa Shule na Walimu Wakuu Jijini Tanga wakati alipofanya ziara yake ya kikazi mkoani Tanga.

Mweli amesema Maafisa Utumishi kwenye Mamlaka za Serikali za Mitaa wamekuwa ni tatizo kwa kuacha kupitisha barua mbalimbali za watumishi wa Umma hasa uhamisho wakiwepo walimu jambo ambalo halikubalkiki. Amesema Maafisa Utumishi waliopo kwenye Halmashauri za Wilaya nchini wanawajibu wa kufuatilia masuala yote ya kiutumishi ya walimu ili kuboresha utendaji katika sekta ya elimu nchini.

“Mkuu wa kituo kukataa kupitisha barua ya uhamisho na kusema uhamisho umesitishwa hilo jukumu sio la kwako kwani  ambaye amepewa dhamana ya kuwahudumia ndiye  atakayemjibu mtumishi husika na kumpa mrejesho wake na sio Mkuu wa kituo kukataa kujibu hoja ya mtumishi husika”

Mweli amesema ziara hiyo inaendelea kufanyika mkoani Tangakwenye wilaya za Tanga Jiji, Halmashauri ya wilaya ya Tanga, Muheza, Korogwe Mji na Halmashauri ya wilaya ya Korogwe lengo likiwa ni kuongea na watumishi hasa walimu na kukagua miradi ya maendeleo ya sekta ya Elimu ili kuboresha utendaji wao wa kazi, kuimarisha utawala bora na pia kusikiliza changamoto  zinazowakabili watumishi walimu nchini.

Aidha, Mweli amesema kuanzishwa kwa kituo cha huduma kwa wateja Ofisi ya Rais TAMISEMI kama wizara ya kwanza nchini kuanzisha huduma hiyo ni maalum kwa watu wote katika kutatua kero za wananchi kwani kutasaidia hatua kwa hatua kuboresha utawala bora na kuonyesha Ofisi yaRais TAMISEMI ni ya Wananchi.

Kwa upande wake Naibu Katibu Mkuu Ofisi ya Rais Utumishi na Utawala Bora Dkt .George Michael amesema Wakurugenzi wa Halmashauri na Maafisa Elimu Msingi na Sekondari watafute namna ya kuwapa motisha walimu ili kuboresha utendaji wao lakini pia kusaidia kuelimisha walimu kuhusu kuzagaa kwa nyaraka za Serikali kwenye mitandao ya kijamii jambo ambalo sio la kimaadili na halivumiliki kwa mujibu wa kanuni, sheria na taratibu za Utumishi wa Umma.

Naye Kassim Ndumbo Mkuu wa shule Old Tanga aliyeshiriki kikao cha Naibu Katibu Mkuu Ofisi ya Rais TAMISEMI Gerald Mweli, amesema Kituo cha huduma kwa Wateja cha Ofisi ya Rais TAMISEMI kitawasaidia katika kutatua changamoto zinazowakabili kwani taarifa zao watazifikisha kero zao moja kwa moja na kwa wakati hali itakayosaidia kujenga imani kwa wananchi na kurudisha mrejesho kwa wakati.