Maafisa Maendeleo ya Jamii waaswa kuzitambua Asasi za kiraia

Imewekwa tar.: November 9th, 2022

Na Mwandishi wetu

Maafisa Maendeleo ya Jamii wa Halmashauri zote nchini wametakiwa kutambua uwepo wa Mashirika  yasiyo ya Kiserikali  katika maeneo yao pamoja na kufuatilia utekelezaji  wa mashirika hayo ili   malengo yaliyosababisha kuanzishwa kwa  mashirika hayo yatimie  na  kuleta maendeleo  nchini.

Rai hiyo imetolewa na Naibu Katibu Mkuu TAMISEMI, Ofisi ya Rais Tawala za Mikoa na Serikali za Mitaa Ramadhan Kailima katika Kikao Kazi cha Maafisa Maendeleo ya Jamii kutoka katika Sekretarieti za Mikoa na Mamlaka za Serikali za  Mitaa kilichofanyika Novemba 8,2022 Jijini Dodoma.

“Tuna mashirika ambayo yanafanya utekelezaji wake katika maeneo yetu tuhakikishe tunafatilia utekelezaji wake, lakini pia tutumie vikao vilivyopo kuyatambulisha mashirika haya hasa katika vikao vya Madiwani wa Kata zetu  ili wao sasa wapeleke taarifa  za utekelezaji  huo  kwa Wananchi”Amesema Kailima

Sambamba na hilo Kailima amewataka Maafisa hao kushirikiakiana na  Maafisa lishe  katika utekelezaji wa afua za lishe  zilizopo katika Sekretarieti za Mikoa na Mamlaka za Serikali za Mitaa ili  kutokomeza  udumavu wa watoto na  kuimarisha lishe bora nchini.

Naye  Katibu Mkuu Wizara ya Maendeleo ya Jamii, Jinsia na Wanawake na Makundi Maalum (WMJJWM)   Dr. Zainabu Chaula amepongeza ushirikiano uliopo baina ya   Ofisi ya Rais-TAMISEMI   na  Wizara ya WMJJWM, amezitaka Wizara hizo kuendelea  kushirikiana kwa  pamoja katika kutoa  mafunzo  ya kimkakati kwa Maafisa Maendeleo Jamii nchini yenye lengo la kukumbushana mambo mbalimbali yakiutendaji.

Kwa upande wake Mwenyekiti wa Bodi ya Mashirika yasiyo ya Kiserikali  Bi. Mwantumu Maiza amewataka maafisa  hao kuhakikisha  wanashirikiana na Maafisa elimu  katika kutokomeza ukatili wa kijinsia pamoja na mimba za Utotoni  kwa kuandaa vikao shuleni ili kuleta uelewa na kuvunja ukimya wa ukatili wa kijinsia na mimba za utotoni.