Maafisa 1,584 kujengewa uwezo Kuhusu Mfumo wa Fursa na Vikwazo kwa Maendeleo Ulioboreshwa

Imewekwa tar.: March 10th, 2020

Jumla ya Maafisa 1,584 kutoka Mikoa 26 na Halmashauri 185 nchini wanaendelea kujengewa uwezo katika vikao kazi vya maelekezo ya kuuelewa Mwongozo wa Mfumo wa Fursa na Vikwazo kwa Maendeleo (O&OD) Ulioboreshwa kuanzia mwezi Januari hadi Juni 2020. Pia, vikao kazi hivi vinashirikisha wadau wengine kutoka Tasisi za Kitaaluma pamoja na wadau mbalimbali wa maendeleo.

Kufikia sasa mikoa 10 ya Dar es salaam, Morogoro, Dodoma, Pwani, Tanga, Manyara, Arusha, Simiyu, Kilimanjaro na Shinyanga, maafisa wake wamekwishajengewa uwezo ili kuuelewa Mfumo wa O&OD.

Akifungua kikao kazi cha maelekezo ya kuwajengea uwezo wataalamu hao, leo mjini Moshi, Katibu Tawala wa Mkoa wa Kilimanjaro Bwana Khatibu Kazungu amesema ni vizuri Mwongozo wa Mfumo wa Fursa na Vikwazo kwa Maendeleo (O&OD) Ulioboreshwa ukaeleweka ili uweze kutekelezwa kikamilifu.

Amesema kuwa Mfumo wa O&OD umejikita katika kuiwezesha jamii kupanga, kutekeleza, kufuatilia, na kufanya tathmini ya miradi wanayoitekeleza tofauti na ule wa awali ambao ulilenga kuwawezesha wananchi kupanga mipango yao na kuipeleka ngazi za juu kwa ajili ya utekelezaji jambo lililokuwa linakwamisha utekelezaji wake na kuleta utegemezi kwa Serikali.

Bwana Kazungu ameongeza kuwa Mfumo wa O&OD mbali na kuondoa changamoto za kutotekelezeka pia umehuishwa katika Mwongozo wa Mpango na Bajeti kutoka Wizara ya Fedha na Mipango 2020/21 unaosisitiza Halmashauri kutumia Mwongozo wa Mfumo wa Fursa na Vikwazo kwa Maendeleo (O&OD) Ulioboreshwa katika upangaji wa mipango ya jamii.

Pamoja na kuhuishwa kwenye Mwongozo wa Mpango na Bajeti kutoka Wizara ya Fedha na Mipango kwa mwaka wa fedha 2020/21 Mwongozo wa Mfumo wa O&OD umezingatia kutoa ushauri wa kitaalamu na kuwapa moyo wanajamii katika utekelezaji wa mipango yao.

Naye Mwakilishi wa Mkurugenzi wa Idara ya Serikali za Mitaa kutoka Ofisi ya Rais Tawala za Mikoa na Serikali za Mitaa Bwana Anicetus Mramba amesema kuwa maafisa wa mikoa 16 iliyobaki wataendelea kupatiwa maelekezo ya matumizi ya Mwongozo wa Mfumo wa Fursa na Vikwazo kwa Maendeleo (O&OD) Ulioboreshwa. Vikazo kazi vya maelekezo ya Mfumo wa O&OD Ulioboreshwa yanatolewa na Timu ya O&OD OR-TAMISEMI kwa kushirikiana na Chuo cha Serikali za Mitaa pamoja na Shirika la Maendeleo la Japan (JICA).

Mwongozo wa Mfumo wa Fursa na Vikwazo kwa Maendeleo (O&OD) Ulioboreshwa umetokana na utafiti uliofanyika mwaka 2007 mpaka 2008 na kubaini mapungufu na changamoto zilizokuwepo katika Mfumo wa Fursa na Vikwazo kwa Maendeleo (O&OD) wa Awali ambazo ni ufinyu wa bajeti uliosababisha kutotekelezwa kwa mipango ya jamii na utegemezi.  

 Na Mathew Kwembe Kilimanjaro