Lishe ni ajenda ya msingi katika kukuza uchumi wa nchi

Imewekwa tar.: February 8th, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amesema ili kukuza uchumi wa nchi lazima kuwepo na rasilimali watu wenye afya ambao wataweza kuzalisha hivyo lishe ni ajenda muhimu katika jamii.

Akiongea leo  na wadau mbalimbali wa lishe nchini  wakati wa ufunguzi wa ofisi ya Nutrition  International iliyopo katika Jengo la LAPF Jijini Dodoma Mhe Jafo amesema  bado suala la lishe halipewi kipaombele katika jamii hivyo ni vyema wadau wanaoshughulika na lishe nchini kuungana na kutoa elimu kwa jamii.  

Amesema kuwa inawezekana ukawa na kundi kubwa linakusikiliza lakini wakashindwa kutoa maamuzi kutokana na tatizo la lishe duni hivyo tunapozungumzia suala la lishe ni ajenda muhimu kwa jamii nchini.

“Inawezekana watu wengi hawajaui madhara ya lishe  kwa ukubwa wake kwa kuwa mtu akila na kushiba  na kuona anaweza kutembea anaona yupo sawa, hivyo ninawaagiza  wadau wote wanaojishughulisha na masuala ya lishe kuhakikisha wanapambana kikamilifu  kutatua changamoto hiyo kwa jamii” amesema Mhe. Jafo

Mhe. Jafo amewaagiza wadau hao kuhakikisha wanajikita katika kutoa elimu kwa jamii kuhusu umuhimu wa lishe nchini ili taifa liwe na rasilimali watu wenye afya njema, wenye uwezo wa kulitumikia taifa na kukuza uchumi wa nchi lengo likiwa ni kufikia uchumi wa viwanda.

Amesema suala la lishe nchini ni ajenda inayopaswa kuwa kipaombele kwa kuwa inahusisha rasilimali fedha ambazo mara nyingi hutumika kuwasaidia watu wenye matatizo ya lishe pale wanapopatwa na maradhi.

Hata hivyo, amewashukuru wadau mbalimbali wa maendeleo ambao wamejiwekeza katika suala zima la lishe ambapo  hali ya udumavu imeweza kushuka kutoka asilimia hamsini mwaka 1991 hadi kufikia asilimia 32   kutokana na mchongo mkubwa mnaoufanya katika kuhakikisha hali ya udumavu inazidi kupungua nchini.

Wakati huohuo,  Mkurugenzi  wa Kanda  ya Afrika  Dkt. Richard Pendame amesema kuwa  shirika la Nutrition International lilianzishwa mwaka 2016 hapa nchini kwa lengo la kuwasaidia  wajawazito,watoto wenye umri chini ya miaka mitano na vijana ambao  wamebalehe katika suala zima la lishe.

Aidha, Dkt. Pendame amesema kuwa  katika tafiti zilizofanywa mwaka 1998 zilionyesha kuwa asilimia 50 ya watu barani Afrika wana utapiamlo, hivyo juhudi za makusudi zinahitajika katika kupambana na tatizo hilo kwa kutoa elimu kuhusu umuhimu wa lishe bora kwa jamii.