Kutoa Mikopo ya Asilimia 10 sio hiari – Dkt. Dugange

Imewekwa tar.: October 29th, 2021

Na Fred Kibano, Mpwapwa

Serikali imezitaka Mamlaka za Serikali za Mitaa nchini kuendelea kutenga fedha kutokana na vyanzo vyao vya mapato kwa asilimia 10 ili kutoa mikopo kwa vikundi vya vijana, wanawake na watu wenye ulemavu kwani ni suala la kisheria.

Kauli hiyo imetolewa na Dkt. Festo Dugange Naibu Waziri Ofisi ya Rais Tawala za Mikoa na Serikali alipofanya ziara yake ya kikazi wilayani Mpwapwa na kuongea na watumishi na kikundi cha Vijana Umoja National Housing bodaboda.

Mheshimiwa Dugange amesema sio suala la hiari kwa Mamlaka za Serikali bali sheria kutoa mikopo ya asilimia 10 kwa makundi hayo.

“kuanzia mwaka 2019/2020 kuna sheria mahususi kabisa ya mikopo ya asilimia 10 ya mapato ya ndani baada ya kutoa vyanzo lengwa ni lazima kwa wanawake, vijana na watu wenye ulemavu wapate mikopo hiyo ya asilimia 10”

Aidha, Dugange amesema Serikali itaendelea kuhakikisha makundi hayo lengwa ya vikundi vijana, wanawake na watu wenye ulemavu yanawezeshwa kiuchumi kama ilivyo azma ya Serikali ya Awamu ya Sita chini ya Mheshimiwa Rais Samia Suluhu Hassan lakini pia amewapongeza vijana hao kwa wa kikundi cha Umoja National Housing Mpwapwa kutambua fursa zinazotelewa na Serikali yao.

Dugange pia amezitaka Mamlaka za Serikali za Mitaa nchini kutoa fedha za mitaji mikubwa yenye tija ili vikundi viweze kuzalisha na kuanza kurejesha mikopo yao kwa wakati badala ya kutoa fedha kidogo kidogo kwani haitawasaidia kujikwamua kiuchumi.

Kwa upande wake Alex Julius Mwenyekiti wa Vijana Umoja National Housing amesema walipokea mkopo wa shilingi 24,500,000 na wao pia kuchangia shilingi 930,000 na kufanya jumla ya shilingi 25,530,000 ambapo walinunua pikipiki 10 aina ya Hajoue 125 CC na kulipia bima.

Aidha, Bwana Alex Julius amesema mradi huo umekuwa na manufaa makubwa kwao na wanatarajia kuwa na biashara kubwa zaidi hapo baadae.

“mkopo huu umetusaidia kujiajiri na kupata kipato na kutoa mchango kwenye kaya, kupunguza umasikini, kutoa huduma ya usafiri wa uhakika na kurejesha sehemu ya mkopo kiasi shilingi 4,130,000 kwa mujibu wa makataba na tunatarajia duka la jumla au kiwanda”

Mikopo ya asilimia 10 kwa wanawake, vijana na watu wenye ulemavu imeanza kuwa na tija baada ya Serikali kuamua kukopesha vikundi fedha nyingi zinazokidhi mahitaji yao.