DKT. MPANGO AWATAKA MARC & RAS KUZINGATIA MAADILI

Imewekwa tar.: August 22nd, 2023

Makamu wa Rais wa Jamhuri ya Muungano wa Tanzania Mhe. Dkt. Philip Mpango amewataka Wakuu wa Mikoa na Makatibu Tawala wa Mikoa kuzingatia maadili na nidhamu kwenye maeneo yao ya kazi.

Akifungua mafunzo ya uongozi kwa Wakuu wa Mikoa na Makatibu Tawala wa Mikoa yanayofanyika katika Shule ya Uongozi ya Mwalimu Nyerere Kibaha mkoani Pwani Agosti 22, 2023, Dkt.Mpango amesema viongozi hao wanapaswa kuwa mfano kwa wengine kwa kufuata misingi bora ya uongozi.

 Aidha, amewataka kuongeza jitihada za kuiwezesha sekta binafsi kwa kuweka vivutio na mazingira mazuri ya uwekezaji ili ikue, ishamiri na kuzalisha ajira.

 Amewahimiza kuzingatia masuala ya uhifadhi wa mazingira hususani kutunza vyanzo vya maji na kufuatilia fursa zitokanazo na shughuli za uhifadhi wa mazingira ikiwamo biashara ya Kaboni na Uchumi wa Buluu.

Makamu wa Rais amesema dhima ya mafunzo hayo ni utekelezaji wa Ilani ya Uchaguzi ya Chama cha Mapinduzi 2020, ambayo inaelekeza umuhimu wa kuendelea kuboresha utoaji wa huduma kwa wananchi katika hali iliyo shirikishi na yenye ubora na kusisitiza serikali ya awamu ya sita inayoongozwa na Rais Dkt. Samia Suluhu Hassan inatambua umuhimu wa mafunzo hayo.

 Naye, Waziri wa Nchi, Ofisi ya Rais – TAMISEMI Mhe. Angellah Kairuki amesema mafunzo hayo yamelenga kuwajengea viongozi hao uwezo wa kuongoza na kusimamia wananchi, fedha na rasilimali zingine muhimu za taifa.

 Pia amesema mafunzo hayo yatawawezesha viongozi kuwa na maamuzi ya kimkakati pamoja na kuwawezesha kuwa na uwezo katika masuala muhimu yanayohusu utekelezaji wa majukumu yao huku amesema yatafanyika kwa siku sita na mada 20 zitawasilishwa.