KIWANGO CHA MAAMBUKIZI YA VIRUSI VYA UKIMWI CHAPUNGUA NCHINI.

Imewekwa tar.: December 1st, 2024

Na. Angela Msimbira RUVUMA

Waziri wa Afya Mheshimiwa Jenista Mhagama ( Mb) amesema kiwango cha Maambukizi ya virusi vya ukimwi nchini  kimepungua kutoka asilimia 7 kwa mwaka 2003/2004 hadi kufikia asilimia 4.4 kwa mwaka 2022/2023.

Akifungua Kongamano la Kitaifa  la Kisayansi kuelekea maadhimisho ya Siku ya Ukimwi Duniani inayofanyika Kitaifa Mkoani Ruvuma Mhe.Mhagama amesema kiwango cha maambukizi ya VVU kutoka kwa mama kwenda kwa mtoto kimepungua kutoka asilimia 18 kwa mwaka 2010 hadi  kufikia asilimia 8.1 kwa mwaka 2023. 

Amewashukuru wadau wa afya nchini  kwa kujikita kikamilifu katika kuhakikisha watoto wanaozaliwa wanakuwa salama bila kuwa na maambukizi ya virusi vya ukimwi.

Ameipongeza Ofisi ya Waziri Mkuu kwa kuendelea kuratibu suala zima la mapambano dhidi ya ukimwi na VVU nchini kwa kutengeneza mikakati unganishi na shirikishi ambayo imesaidia kupunguza maambukizi ya virusi vya  ukimwi nchini.

 "Ni lazima kuona thamani ya tathmini yetu ambayo inatuonyesha tulipotoka ,tulipo na tunakoelekea" amesema  Mhe.Mhagama

Ameendelea kusisitiza kuwa kila mmoja anakila sababu ya kuwa ni mshiriki namba moja wa kulinda mafanikio yaliyopatikana  na kuhakikisha tunafanya vizuri zaidi katika maendeleo ya mapambano dhidi ya VVU na ukimwi 

Amewataka TACAIDS kuendelea kuweka utaratibu wa kusikiliza na kutatua malalamiko yanayotokana na unyanyapaa kwa waathirika  na kuhakikisha kunakuwepo na vituo  salama kwa ajili ya vijana hasa kwenye kanda.

Amewataka kuhakikisha wanaweka utaratibu utakaosaidia kusambaza muongozo wa unasihi kwa kuzingatia mila na desturi za kitanzania hasa pale miongozo hiyo itakapokuwa inatumika kwenye shule zinazotoa elimu kwa watoto wa kitanzania

"Tunazo mila na desturi zetu hivyo ni vyema tukazingatia sana mila na tamaduni zetu katika kutoa na kutumia miongozo ya unasihi na hasa kwa watoto katika maeneo ya utoaji wa elimu"amesisitiza Mhe.Mhagama

Aidha, amewataka wadau wa sekta binafsi na Umma zihamasishwe, kuwekeza katika ujenzi wa viwanda kwa ajili ya vifaa, bidhaa tiba za ukimwi ndani na nje ya nchi ya Tanzania