Kituo cha mabasi Mbezi Luis kutarajiwa kuanza kazi Oktoba, 2020

Imewekwa tar.: August 17th, 2020

Kituo kikuu cha Mabasi yaendayo mikoani na nchi jirani cha Mbezi Luis kimefikia asilimia 77 ya ujenzi wake na kinatarajiwa kuanza kazi rasmi ifikapo Oktoba mwaka huu.

Akizungumza wakati wa ziara ya Katibu Mkuu Ofisi ya Rais Tawala za Mikoa na Serikali za Mitaa Mhandisi  Joseph Nyamhanga anayetembelea miradi mbalimbali iliyopo jijini Dar es Salaam, Mkurugenzi wa Jiji hilo Zipora Liana, amesema kukamilika kwa ujenzi huo kunatokana na juhudi za haraka zilizochukukiwa na Jiji pamoja na mkandarasi za kumaliza ujenzi kwa wakati.

Ujenzi huo ulioigharimu Serikali kiasi cha Shilingi Bilioni 50.9 pindi utakapokamilika utakifanya kituo hicho kuwa moja ya kituo bora kati ya vituo vya mabasi katika ukanda wa Afrika mashariki na kati huku kikitarajiwa kuchukua mabasi makubwa 108 kwa wakati mmoja.

Mbali na mabasi hayo, pia kitaweza kuchukua mabasi madogo zaidi ya mia moja huku kikiwa na huduma mbalimbali zikiwemo za migahawa, benki, zahanati kituo cha polisi, maduka pamoja na sehemu za kuoshea magari.

"Ujenzi wa kituo hiki ulipaswa kuwa umekamilika tangu Julai mwaka huu na kazi kuanza, changamoto mbalimbali zilizokuwa zimejitokeza ikiwemo mvua na ugonjwa Covid 19 ulisababisha kazi kuchelewa" amesema Liana.

Ameendelea kusema kuwa  mbali na hilo pia Jiji lilisitisha kuendelea na mkataba na aliyekuwa mkandarasi mshauri katika ujenzi huo ambaye kimsingi amesema kwa kiasi fulani alikuwa sehemu ya kuchelewesha kazi katika mradi huo kuweza kukamilika kwa wakati.

Bi. Liana amesema  matarajio ya kituo hicho kitaweza kukusanya kiasi cha  shilingi Bilioni 7.2 kwa mwezi zitakazotumika kwa ajili ya maendeleo mbalimbali ya Jiji hilo pamoja na taifa kwa ujumla.

Aidha akizungumza mara baada ya kupokea taarifa za ujenzi huo, Katibu Mkuu Ofisiya Rais TAMISEMI Mhandisi Joseph Nyamhanga amesisitiza kukamilika mapema kwa ujenzi huo ili kuwezesha mabasi kuanza kutumia kituo hicho na kupisha  eneo la kituo cha sasa cha Ubungo ambapo kunatarajiwa kujengwa karakana ya mabasi yaendayo kasi.

Mhandisi Nyamhanga amesema kuwa  malengo ya Serikali ni kuona mradi huo umekamilika mapema ili kuondoa changamoto mbalimbali zilizopo kwa sasa katika kituo cha Ubungo na kusababisha kero kwa watumiaji wa kituo hicho huku akisisitiza kuwa matarajio ni kuona kituo hicho kinaanza kutumika katikati ya Oktoba mwaka huu.

Aidha amesisitiza kuwa Serikali imewekeza fedha nyingi katika miradi yake hivyo jambo la msingi ni kuona miradi hiyo ikitunzwa ili kuepusha kusababisha hasara ya fedha iliyotokana na fedha za wananchi.

Na. Angela Msimbira DAR-ES-SALAAM