Katibu Mkuu mpya Ofisi ya Rais TAMISEMI akabidhiwa ofisi

Imewekwa tar.: April 12th, 2021

Na Asila Twaha, Dodoma

Katibu Mkuu mpya Ofisi ya Rais, Tawala za Mikoa na Serikali za Mitaa, Prof. Riziki Shemdoe amekabidhiwa rasmi ofisi na aliyekuwa Katibu Mkuu wa ofisi hiyo Mhandisi. Joseph Nyamhanga.

Makabidhiano hayo yamefanyika leo, makao makuu ya Ofisi ya Rais Tawala za Mikoa na Serikali za Mitaa katika Mji wa Serikali Mtumba na kushuhudiwa na wakurugenzi wa ofisi hiyo.

Baada ya kukabidhi ofisi kwa Katibu Mkuu mpya Mhandisi Nyamhanga amewashukuru wakurugenzi, na watumishi wa ofisi ya Rais TAMISEMI pamoja na taasisi zake kwa kufanya kazi kwa weledi, uadilifu na uaminifu katika kutekeleza majukumu yao.

Aidha amewashukuru viongozi waliopita kwa kumuamini na kumpa jukumu la kuweza kusimamia Wizara hiyo katika kipindi chote alichotumikia na amemtaka kila mtumishi kuwa Balozi na  kuiwakilisha vizuri ofisi hiyo katika kuwatumikia wananchi.

 Kwa upande wake, Katibu, Mkuu Prof. Riziki Shemdoe amemshukuru Mhandisi Nyamhanga kwa kumkabidhi ofisi na kuahidi kufanya kazi kwa weledi, uadilifu na uaminifu kwa kushirikiana na watumishi, taasisi zilizopo chini ya Wizara hiyo katika kushughulikia changamoto za wananchi.

Akitoa neno la shukrani kwa niaba ya wakurugenzi na watumishi wa Ofisi ya Rais - TAMISEMI, Mkurugenzi wa Idara ya Tawala za Mikoa Beatrice Kimoleta amemshukuru Mhandisi Nyamhanga kwa kuwaongoza vyema katika kipindi chake chote cha uongozi wake na amempongeza Katibu Mkuu Prof. Riziki Shemdoe   kwa kuteuliwa kushika nafasi hiyo huku akimuahidi kwa niaba ya wenzake kufanya kazi kwa bidii kutekeleza majukumu yao.