‘Karibu Tamisemi Tuchape Kazi’ Jafo

Imewekwa tar.: November 12th, 2018

Waziri wa Nchi Ofisi ya Rais Tawala za Mikoa na Serikali za Mitaa Mhe.Selemani Jafo amemkaribisha Mhe. Waitara Mikwabe Mwita(Mb) ambaye ameapishwa mapema leo hii kuwa Naibu Waziri Ofisi ya Rais TAMISEMI kujiunga na Timu ya Wizara katika  kufanikisha shughuli za maendeleo ya wananchi.

Akimkaribisha kuzungumza na watumishi katika Ofisi ndogo ya Dar es salaam Waziri Jafo amemwambia Mhe. Wairata kuwa Watumishi wa TAMISEMI wanaushirikiano wa hali ya juu  na  watakuwezesha  kufanikisha majuku yako.

“Karibu tuchape kazi hapa kwetu ni kazi tu; Sina shaka na wewe kwakuwa ni rafiki yangu wa siku nyingi na jirani jimboni kwangu hivyo nafahamu fika utendaji wako  karibu tuwatumikie watanzania” alisema Jafo.

Wakati huo huo Waziri Jafo aliwapongeza watumishi kwa weledi waliouonyesha kwa kipindi chote cha Uongozi wa Naibu Waziri Mhe. Joseph George Kakunda katika Wizara hii mpaka alipoteuliwa na kuapishwa rasmi leo hii kuwa Waziri wa Viwanda Biashara na Uwekezaji.

“Tumepata faraja kubwa sana kwa Mhe. Kakunda kuchaguliwa kuwa Waziri kamili na mafanikio haya ni yetu sote kwani tumefanya naye kazi nzuri zilizopelekea kuteuliwa katika nafasi ya juu zaidi ninawapongeza watumishi wote wa TAMISEMI na ninawasihi muendeleze kazi hii nzuri kwa Naibu Waziri Waitata: alisema Jafo.

Naye Naibu Waziri OR-TAMISEMI Mhe. Waitara M. Mwita amesema ameteuliwa kuja  Tamisemi kuboresha shughuli mbalimbali za Wizara  na sio kuvuruga hivyo anahitaji ushirikiano wa watumishi waliopo.

“Mimi ni mtu wa kazi na TAMISEMI ninaifahamu kwa sababu nimewahi kuwa mwenyekiti wa mtaa wa mwaka 2014 na  mjumbe kwenye Kamati ya bunge ya TAMISEMI hivyo ninaifahamu vilivyo Wizara hii kwaiyo nataka kutumia uwezo wangu kuboresha zaidi shughuli za Wizara ili tuweze kutoa huduma bora kwa wananchi” alisema Waitara.

Aliongeza kuwa tutasumbuana kwenye kazi tu na sio kwenye mambo madogo madogo cha muhimu kwetu sisi ni kazi mengineyo hayana nafasi kwa wakati huu.

Katika uteuzi uliofanyika Novemba 10,2018 aliyekuwa Naibu Waziri TAMISEMI Mhe. Joseph George Kakunda aliteuliwa kuwa Waziri wa Viwanda, Biashara na Uwekezaji na nafasi yake kujazwa na Mhe. Waitara Mikwabe Mwita.

Mwisho.