Kamati ya Bunge yaridhishwa na ujenzi wa Kituo cha afya cha Mtwango.

Imewekwa tar.: March 18th, 2022

KAMATI ya Bunge ya kudumu  ya Utawala na Serikali za Mitaa   imeridhishwa  na ujenzi wa Kituo cha Afya cha  Mtwango  katika Halmashauri ya Wilaya ya Njombe kilichojengwa  kwa gharama ya shilingi milioni 900 ikiwa ni Mapato ya ndani ya Halmashauri.

Hayo yalisemwa leo tarehe 17/03/2022 Mkoani Njombe na Mwenyekiti wa  kamati hiyo Abdallah Chaurembo wakati wa ziara ya kamati hiyo katika Halmashauri ya Wilaya ya Njombe  kukagua mradi wa maendeleo unaotokana na mapato ya ndani ya Halmashauri.

Chaurembo amempongeza Mkurugenzi wa Halmashauri hiyo Bi. Sharifa Nabalang’anya na Mhadisi  Zuberi Tengeremo  kwa kuonyesha mfano wa kumsaidia Rais wa Jamhuri ya Muungano wa Tanzania  kwa vitendo kwa kuweza kusimamia kwa weledi ujenzi huo  kwa viwango vya hali ya juu

Ametumia nafasi hiyo kutoa maelekezo  kwa Wakurugenzi wa Halmashauri zote nchini kuhakikisha wanatekeleza maagizo ya yaliyotolewa na kamati kuhusu kuhakikisha kila Halmashauri inatumia mapato yake ya ndani kulingana na makusanyo kwa kujenga  vituo vya afya au zahanati na kutaka kuandaa taarifa ya kina kuhusu utekelezaji wa maagizo hayo.

“Tunataka wale walioambiwa kujenga zahanati au kituo cha afya walete taarifa ya vituo vilivyojengwa kwa viwango kama hichi cha mtwango, tunafahamu wapo baadhi ya wakurugenzi hawajaanza kutekeleza maagizo ya kamati pamoja na kuwapitishia bajeti   niwatake wakurugenzi hao kujitathmini” amesisitiza Chaurembo

Aidha, amewataka Wakurugenzi wa Halmashauri kutimiza majukumu yao kwa kuhakikisha wanatenga fedha za makusanyo ya ndani  kwa ajili ya ukelezaji wa miradi ya maendeleo na kuhakikisha wanaisimamia kwa weledi  ili iweze kukamilika kwa wakati na kuanza kutoa huduma kwa jamii.