Jiji wabanwa, waagizwa kutenga fedha ujenzi wa Barabara za Ndani

Imewekwa tar.: September 3rd, 2021

Waziri wa Nchi Ofisi ya Rais Tawala za Mikoa na Serikali za Mitaa Mhe. Ummy Mwalimu ameuagiza uongozi wa Halmashauri ya Jiji la Dodoma kutenga fedha kwa ajili ya ujenzi wa barabara za ndani ya Jiji.

Akikagua maendeleo ya ujenzi wa barabara ya Mwangaza-Kisasa-Medeli leo  zenye urefu wa kilometa  10.7 Waziri Ummy amesema  Dodoma kwa sasa ni makao Makuu ya Nchi, hivyo kunahitajika miundombinu ya barabara inayofanana  na makao  Makuu ya nchi.

“Jiji lazima mhakikisha Jiji la Dodoma  linakuwa na miundombinu bora ili kuwapunguzia adha wananchi katika kipindi cha mvua”, amesema Waziri Ummy na kuongeza, kuwa “ni muhimu kwa Halmashauri ya Jiji la Dodoma kutenga fedha  kupitia mapato ya ndani  ili kuzifanya barabara  hizo kupitika kwa urahisi wakati wote lakini iendane na hadhi makao makuu.

Ameendelea kusema kuwa, Rais wa Jamhuri ya Muungano wa Tanzania Mhe. Samia Suluhu Hassani  ameongeza  bajeti ya Wakala wa Barabara Vijijini na Mijini  kutoka Bilioni 275 kwa mwaka 2021 hadi kufikia shilingi  bilioni 960 ,ambapo kwa Jiji la Dodoma wameongezewa kutoka shilingi milioni 800 hadi bilioni 24 hivyo Dodoma ikiwa ni makao makuu ya nchi kunahitajika kuwa barabara zinazoendana na Makao Makuu ya nchi.

Kuhusu utunzaji wa Mazingira, Waziri Ummy amewaagiza Wakala wa barabara Mijini na Vijijini (TARURA) kuhakikisha wanaweka kigezo cha Mazingira kwenye mikataba ya ujenzi ili kuhakikisha barabara zote zinazojengwa zinapandwa miti ili kuboresha mandhari ya Jiji.

Aidha amewataka TARURA kuhakikisha wanasimamia kwa weledi wakandarasi watakaopatiwa kazi ya ujenzi wa miundombinu ya Barabara nchini ili fedha zilizotolewa na Serikali ziendane na ubora wa barabara zinazojengwa.

Ziara ya Waziri wa Nchi Ofisi ya Rais, Tawala za Mikoa na Serikali za Mitaa Mhe. Ummy Mwalimu, ni muendelezo wa ziara zake katika kukagua na kutoa maelekezo mbali mbali kwenye mamlaka za Serikali za Mitaa.