Jiji la Dodoma Waagizwa kutenga eneo maalum kwaajili ya wajasiriamali

Imewekwa tar.: July 26th, 2018

Waziri wa Nchi, Ofisi ya Rais-TAMISEMI, Selelmani Jafo ameutaka uongozi wa Manispaa ya jiji la Dodoma kuandaa eneo maalumu kwa ajili ya wajasiriamali wadogo walionufaika na mkopo kutoka mfuko wa kuwezesha vikundi vya wanawake, vijana na walemavu.

Mhe. Jafo ameyasema hayo leo Jijini Dodoma wakati akikabidhi hundi ya Sh Milioni 950 zilizotolewa na Halmashauri ya Jiji la  Dodoma kwa ajili ya vikundi hivyo na kusema kuwa licha ya kutoa fedha hizo ni wajibu wao pia kuwatafutia masoko kwa kuwa wanufaika hao wamekuwa wakikabiliwa na changamoto ya masoko.

‘’Viongozi mpange Mpango Mkakati wasoko la kuuza bidhaa za wajasiriamali hawa, nimeona wana bidhaa nzuri sana hauwezi kuamini kama zinatoka Dododma, lakini kila mmoja ukimuuliza soko anakwambia hana soko maalumu’’ Alisema Mhe Jafo na kuongeza

‘’Mbali na kuwapa fedha lakini pia nakuagiza Mkurugenzi na Mstahiki Meya mtafute eneo la kimkakati kwa hawa mnaowapatia mkopo na vikundi vyote vilivyowezeshwa na Halmashauri hii, kwa kufanya hivi tunaweza kuwa na eneo moja maalumu ambalo litakuwa linafanya maonyesho kwa mwaka mzima’’ Alisema

Mbali na agizo hilo lakini pia Mhe Jafo ametoa muda wa mwaka mmoja kwa uongozi wa Jiji kuhakikisha watu wenye ulemavu wanapatiwa maeneo kwa ajili ya biashara ili kuondoa vitendo vya ombaomba vinaendelea jijini Dodoma pamoja na kuwawezesha katika vifungashio wanufaika wote.

Akikabidhi hundi hiyo kwa vikundi 168 vya wanawake pamoja na vikundi 66 vya vijana Mhe Jafo aliwataka wanufaika hao kujenga uaminifu wa kurejesha mkopo huo ili watu wengine waweze kukopeshwa na kuachana na dhana potofu kuwa fedha hizo ni za hisani.

Awali Mkurugenzi wa Jiji la Dodoma Godwin Kunambi alimweleza Wazari Jafo kuwa fedha hizo zinatokana na ukusanyaji bora wa mapato ya ndani na kwamba kwa sasa wanatoa mkopo mkubwa wa kuanzia Sh. Milioni moja hadi milioni kumi na kuvitaka vikundi vilivyokidhi vigezo kutuma maombi.

Anaandika Zulfa Mfinanga